Stamford Bridge-ah Conte hote an chak lo ; Chelsea leh Spurs an inhnaih sawt

Premier League-ah Crystal Palace-in Inrinni zan khan hmahruaitu Chelsea chu chak lo thei an ni tih an hriattir a, Antonio Conte hote chak lohna hmun hi Stamford Bridge a ni.

Pahnihnaa awm Totten­ham Hotspurs-in Turf Moor-ah mualneitu Burnley 2-0 in an hneh a, league nomawi inchuh­na boruak a nung sawt.

Chelsea hian match kua khelh hmabak la awmah point 69 an hmu a, Tottenham nen an khelh zat inang chungin point sarihin an la sang zawk.

Amaherawhchu Blues hian Manchester khaw pahnih City leh United bakah Spurs an la hmachhawn dawn a, nomawi chawi tur chiang tawha thutlukna siam tawh pawhin an ngaihtuah ṭhat leh a ṭul ang.

Minute 11!
Inhliam vanga Belgium tana inlan thei lo Eden Hazard a dam tawh a, minute ngana lekah Belgian midfielder ball pek chu Cesc Fabregas-a'n a khung nghal.

Premier League hmahruaitu Blues hi an tawlhthluk theih a rin­awm lo a, tla thei dinhmuna ding Crystal Palace hmabak a thim.

Amaherawhchu Sam Allar­dyce hoten a êng zawngin an thlir a, minute kuanaah Wilfried Zaha-a'n a mimal thiam vang liau liauin Chelsea defender-te venna hnuaiah a pet goal. Second 91 hnuah Ivorian winger Zaha siam chu Christian Benteke-a'n cool takin a khung chhunzawm bawk.

Chelsea-in point hlawh chhuak turin insiamṭhatna hun an nei a, ṭum dang ang thoin goal khung turin thawkrim mah se an vannei tawk lo a, Palace keeper Wayne Hennessey chet ṭhat ni an tawn bawk avangin minute 11 chhunga goal lut bak a luh belh lo. Eagles keeper Hennessey hian vawi 11 save a nei a, hei hian inkhel kalhmang a sawifiah.

Injury time rei tak!
Chelsea-in referee aṭangin duhsakna an dawng a, injury time-a minute sarih an pek belh an hman zawh hnuah pawh minute li dang an khel leh a, goal an khung chuang lo.

Blues hian fiahna hautak an paltlang chho dawn niin a lang bawk. Conte hote hian European competion an khelh ve loh avangin hahdamna hun ṭha an nei zel a, tun ṭumah erawh player pawimawh N'Golo Kante-a'n ram tana a inlan avangin ṭum dang a pha lo tih hai rual a ni lo.

Chelsea hian nikum October 1 hnu khan Italian manager Conte hnuaiah starting eleven-ah player 13 chiah an la hmang a, hei hi an result ṭhatna chhan a ni. April 5 zanah Blues-in Manchester City an mikhual nghal dawn a, tun thla hian match ruk khelh hmabak an nei a, Chelsea squad a chhah ṭha tawk em tih fiahin a awm ang.

Conte a puitling
Chelsea manager Antonio Conte chuan, "Football a ni a, kan result neihah kan lungawi a ṭul a ni. Minute ngana lekah goal khung mah ila goal hnih kan chhuah lehnghal vat avangin insiamṭhatna tur kan nei a ni. England-ah chuan team zawng zawng an ṭha a, eng pawh a thleng a ni," tiin chak lo thei an ni tih a pawm.

Italian manager chuan an match khelh hmabak Manchester City-ah chiah rilru pek an ma­mawh thu a sawi lang bawk.

Big Sam a ni tlat
England manager aṭanga ban Sam Allardyce-a'n relega­tion battle hmachhawn kawngah tawnhriat a ngah a, Crystal Palace a enkawl ṭantirhin result nei ṭha lo mah se match hnu­hnung paliah an chak tawh.

Palace manager Big Sam chuan, "Kan tlarhnung an khel ṭha a, goalkeeper a khel ṭha a, goal tam zawk khung thei kan ni bawk. Champion ni ngei tur a nih loh pawhin champion ka rin ber laka point thum kan hmu thei hi a hlu bik a ni," tiin an result chu a chhuan thu a sawi.

Allardyce hi club hrang hrang pali enkawla Chelsea hneh thei hmasa ber a ni a, goal khungtu Benteke-a'n Palace hma hian Aston Villa leh Liverpool tana a khelh laiin Blues lamah a khung tawh bawk.

Nomawi beisei Spurs
Tottenham-in point hlawh­chhuah harsatna Turf Moor-ah an beisei angin bul an ṭan ṭha lo a, Burnley khelmualah hian Dele Alli-a'n goal khung theihna tur a hlah bakah central midfielder pahnih Victor Wanyama leh Harry Winks te chu inhliam avangin first half-ah thlak ve ve an ni.

Second half-ah Spurs an huaisen tawk tih a lang a, Eric Dier (66') leh Son Heung-min (77') ten goal an khung a, Burnley 2-0 in an hneh.

Tottenham boss Mauricio Pochettino chuan, "Kan ze ṭha lam kan lantir a, second half-a kan khelh dan kha lungawina tur hlir a ni. Kan tan chuan hnehna hlu tak a ni a, Chelsea an chetsual palha remchang la thei dinhmuna kan awm ve hi a ṭul a ni. Premier League champion hi kan duh a, point 10 leh point sarih a la inang lo," tiin champion kawng a la inhawn thu a sawi.