Konta tan hun ropui bik

Johanna Konta chuan tennis a khelh hun chhunga a hun tawn sang ber a tawng. Britain number 1 hian Caroline Wozniacki hnehin Mimai Open nomawi a chawi.

Inrinni zan final khelh­ah Konta hian Woz­niacki lakah 6-4, 6-3 in hnehna a chang. Konta hian final lut turin Grand Slam vawi sarih champion tawh Venus Williams chu a lo hneh tawh bawk. Konta hi June 2015 kha chuan world number 146 a ni a, tun hnaiah nasa taka hmasawnin tun kara ranking chhuak thar turah chuan world number 7 a ni der tawh ang!

Kum 25-a upa Konta chuan, "Player hrang hrangte zinkawng a inang lo, kei chuan nomawi lian tham chawi turin ka nghah rei a ngai hle. Tunah hian ka khelh ṭhat hun vanglai ka tawng chho mek niin ka hria a, khawvela a ṭha berte zinga tel phak hi ka naupan lai aṭanga tawha ka suangtuah ṭhin chu a ni," tiin a sawi.

Konta hian tun hnai ni 10 chhung lekin match 6 a khelhah hnehna a chang vek a, set hnih bak a hloh lo bawk. Kuminah match 19 hnehna a chang tawh a, vawi thum chak loh a nei tawh. WTA hnuaia inelna ngaihhlut ber Grand Slam nomawi la chawi loh mah se tuna a khelh dan en chuan major title la thei turte zinga mi a ni.