MSL3 hmahruaitu Zarkawt BCA Amritpal-a'n TBL vawi 3 a dunk khum

Mizoram Super League-a vawi hnih champion tawh Khatla TBL-in season thum­naah ngam loh an tawng a, Zirtawpni zan khan Zarkawt BCA-in champion lai hi 67-51 in an sawp.

BCA hi match hnih khelh tawha vawi hnih chak thei awm chhun niin hmahruaitu an ni.

BCA-in an state pawn player pahnih Amritpal Singh leh Yadwinder Singh te chu mipui hmuh theih turin an pho chhuak a, feet ruk leh inches 11-a sang Amirtpal a hmuhnawm hle.

Zarkawt an lam

Zarkawt BCA-in an match hmasa berah Mizo hlanga khel chungin Tuikual South an hneh tawh avangin TBL hmachhawn turin an phur tawh hle.

Zirtawpni zanah hian Am­rit­­pal-a'n inkhel bul ṭanin TBL player pathum Eddie Zaithan­mawia, R. Lalmalsawma leh Lalrinpuia ten veng mah se chiang takin a dunk nghal. Zar­kawt ṭantu an lawm a, Hawla Indoor Stadium-ah thawm a ṭha hle.

Amaherawhchu ONGC player Amritpal hian foul vawi hnih a neih zui avangin an la chhuak nghal a, second quarter ṭantirhah pawh dunk nawn a tumna lamah a foul nghal avangin hun chanve hmalam a inlan meuh lo.

Third quarter-ah Amritpal rawn inlan lehin a lenna a rawn hmang ṭangkai leh nghal a, vawi hnih dang a rawn dunk. Basketball hmuhnawm tehnaah dunk hi a tel a nih chuan BCA leh TBL inkhel hi a entlak takzet.

Yadu leh Garry

Zarkawt BCA-in Yadwinder Singh an neih tel avangin har­satna an tawk lo a, Khatla TBL player pawimawh H. Laldin­sanga nena India team-a khel ho ṭhin player hian a tawnhriat neih ṭhat a rawn lantir.

Yadu hian ONGC tana a khelh pui Amritpal angin

ṭul loah a foul ve lo a, langsar vut si loin a hunah tak a inlar zel.

BCA chungnung mah se Khatla TBL player Garry Gill thiamna an thai bo sak thei lo a, Garry hian kawppui ṭha a neih chuan TBL hi a vawi thum nan a champion pui thei ang?

Danglamna Mizo

Amirtpal-a'n vawi thum a dunk avangin a langsar a, BCA chakna chhan erawh Mizo player an ni.

Coach Lalruatfela hnuaiah BCA player-te shooting a ṭha a, free throw an hlah meuh loh bakah 3-points an lut thei bawk.

Zarkawt club tana lut hnem ber chu Dennis Lalmuanpuia a ni a, Dawrpui Vengthar tlangval hian point 16 a score. Ramthar Veng rawlthar Zonunsanga a che rang a, steal vawi sarih a neih zingah a zawn zata Garry Gill vawi hnih a chhuhsak chuan mipui lawm a hlawh hle.

Beisei pha lo TBL

Khatla TBL tan H. Laldin­sanga'n bul a ṭan a, MSL1 MVP hi tun hma ang thoin la thiam reng tih lantir nan point 18 zet a nei. Amaherawhchu Mapuia tan hian Mizo zingah amah thlawp pha khawpa khel ṭha an awm lo a, Mizo leh Mizo-a khel ṭha zawk chu BCA an ni.

MSL2-a MVP Vanlalmuan­a'n point hnih chiah a thawh a, theihna nei sanga ngaih Eddie Zaithanmawia pawhin tun season-ah a theihna a lantir lo - season liam ta a pha lo hle. Besei pha lo zingah Gospel Lalthawmmawia pawh a tel a, match pawimawhah Nelson Lalrohlua chu squad-ah a lang pha lo bawk. A lungthu kim nan TBL-in champion an tum a nih chuan insiam ṭhat an mamawh tih a chiang.