Bagan hmaah Bengaluru an zawr

Mohun Bagan tan I League nomawi beiseina a la chuai lo - Kolkata club hian an chunga awm East Bengal leh Aizawl FC ûmin Bengaluru FC chu 3-0 ngawtin an sawp. Bangalore club lian laka an khelh dan enin champion turin an ṭha tawk tih hai rual a ni lo.

Inrinnia Rabindra Sarobar Stadium, Kolkata-a inkhelah Bagan tan captain Katsumi Yusa chuan goal hnih a khung bakah Darryl Duffy chuan goal khat a thawh ve bawk a, mikhual zakzum Bengaluru-in a chhanletna tur an neih loh avangin Kolkata club-in hnehna an chang.

Tu nge inlan?

Mohun Bagan coach Sanjoy Sen-a'n India tana zin chau Mizo tlangval Jeje Lalpekhlua chu bench lama hun hmantir a thlang zawk a, minute 84-naah Scottish striker Duffy thlak tura tlan luhtir ve chauh a ni.

Kum 2015-a Bagan I League nomawi hmasa ber chawipuitu coach hian player ṭha chawlhtir vek erawh a duh lo a, Sony Norde-a'n CONCACAF Gold Cup qualifier khelh vangin India thleng turin darkar 20 mamawh mah se hahchawlhtir loin khelhtir a ni.

Bengaluru tan Jeje ang thoa zin chau Sunil Chhetri chu hahchawlhtir a ni a, Mizo rawlthar ṭhangduang Daniel Lalhlimpuia chu inkhel bul ṭantir a ni. Chaltlang rawlthar Malsawmzuala'n coach thar Albert Roca hnuaiah hmun a chang phak meuh lo a, Mohun Bagan nena an inkhelah erawh Sawmtea hian hun pumin a khel thung.

Inkhel chu

Inkhel hamrik ham a nih rualin Bagan-in an nawr nghal. A chau ve thei lo emaw tih mai tura khel Norde chuan minute 14-naah Katsumi tan a siamsak a, Japanese midfielder hian a hun ṭha a hlah lo.

Minute sawm a liam a, Bagan bawkin goal an khung. Haiti inter­national Norde freekick chu Duffy-a'n a tauh lut a, Cameron Watson leh Juanan ven karah a hun ṭha hlah nawn a tum lo.

I League-a player hlawh hnem ber anga an sawi winger Norde hian season khata nuai 250 hlawh a phu chhan pholangin Sandesh Jhingan, Sawmtea, Udanta Singh leh Nishu Kumar-te bumin yard 50 zet ball a tlanpui a, vanneihna teltu chu Katsumi a ni - Norde hnen aṭanga a ball hmuh chu an goal thumna ni turin a khung a, Bagan an chak.

Roca a chesual

Bengaluru-in I League-ah no­mawi an beisei ngam tawh lo a, AFC Cup lamin an rilru a kap tawh zawk. April 4-ah Bangalore club hian AFC Cup match khel turin Maziya S&RC chu Maldives-ah an lenchilh dawn a, hei hi rilrua dah chungin coach Albert Roca chuan player naupang rual a khelhtir.

Barcelona assistant coach hlui chuan a tihsual hi pawmin, "Player naupang zawk khelhtirin risk ka la a, kan chak loh chhanah hian mawh ka phur a ni. Keini chuan league aiin AFC Cup lamah rilru kan pe tawh zawk a, Sunil Chhetri leh Eugeneson Lyngdoh ka chawlhtir chhan pawh kha a ni," a ti.

Sen-a thukhawchang

Mohun Bagan coach chuan, "Chak hi kan tan a pawimawh a, kan hmabakah match nga a la awm tih erawh theihnghilh a thiang lo," a ti.

Kum 56-a upa coach Sanjoy Sen chuan BFC boss chhuanlam a pawm lo a, "Kei ni pawhin AFC Cup kan khel ve tho a, bench-ah Balwant Singh leh Jeje kan dah. Bengaluru tan CK Vineeth leh Daniel-te pawh an khel a, nikuma Chhetri tela an khelh pawhin 5-0 in kan sawp tawh. Kan hma lawka AFC Cup khelh turah ngaihtuahna kan sen ve tho a ngai a, keini erawh Bengaluru ang kan ni lo a, kan telnaah champion beiseina kan la nei vek a ni," tiin a ṭawng ngeiawm hle.

Bagan hian April 4-ah vek AFC Cup-ah Dhaka Abahani an hmachhawn ang.