Monaco hnehtu PSG champion

Paris St-Germain chuan AS Monaco 4-1 a hnehin French League Cup champion an ni, he inelna bikah hian a zawnin kum li an champion-na a ni nghal bawk.

Inrinni zan Stade des Lu­mieres-a final inkhelah PSG tan hian minute lina lekah January transfer laia an lakluh Julian Drax­ler chuan goal hmahruai a khung. Monaco hian goal an phur rei duh bik lo, yard 20-a hla aṭangin Thomas Lemar chuan minute 27-na lekah an siphurh a sut.

Champions League last 16 aṭanga tla hlim PSG an talbuai dawna a lan hnuah Draxler-a goal khung tur siamsaktu Angel Di Maria chuan an hmahruai vawi hnih nan goal a khung a, striker chhuanvawr Edinson Cavani-a'n goal hnih a khung zui bawk avangin Monaco tan kum 2003 hnulama inelna liana nomawi chawi an tumna a thamral.

Uruguay international Ca­va­ni hian tun season-ah a club tan inelna hrang hrangah goal 40 a khung tawh a, club tan season khat chhunga a goal khung hnem ber ṭum a tawng mek. League Cup bakah hian a club hi league leh French Cup chawi thei din­hmunah a la dinpui mek bawk.

PSG coach Unai Emery chuan, "Nomawi kan chawi thei hi ka lawm, ka lawmna ti zualtu chu kan elpui Monaco kan hneh hi a ni. He hnehna hian inrintawkna min pe ang a, tun season chhunga inkhelh hmabak kan la neih zawng zawngah chak vek kan tum tawh ang," tiin a sawi. Spanish manager hian nomawi chawi duha an tuihalna a la reh loh thu a sawi tel bawk.

PSG president Nasser Al-Khelaifi pawhin Champions League aṭanga an tlak vang ngawtin an coach Emery dem tur a nih rih loh thu sawiin, "Vawiinah hian kan nihna dik tak kan pho chhuak, coach ṭha tak bakah player ṭha kan neih zia a lang," tiin a lawm thiam hle.

Leonardo Jardim-a enkawl Monaco hian final lut tur hian match ruk an khelhah goal 18 khungin harsatna tawk loin hnehna an chang, final-ah erawh player ṭha rual awmkhawmna PSG lakah an talbuai.

Chak lo mah se Monaco tan hian kumin hi season duhawm a la ni chhunzawm thei tho. Ligue 1 hmahruaitu an la ni a, champion lai PSG nen khelh zat inangah point thumin an sang zawk - kum 2000 hnua a vawi khat nan league title an beisei mek. PSG thlen phak loh Champions League quarterfinal an lut tawh bawk.

Monaco coach Jardim chuan, "Inelna hrang hrang kan khelh avangin hun harsa tawn chang hi chu a awm lo thei lo. Kan chhe ta vek tihna a ni bik lo, ka player naupang tam tak tan tawnhriat ṭha tak a ni ngei ang. Season a la zawh loh avangin chawl loin kan thawkrim chhunzawm ang," tiin a sawi.