Schneiderlin-a'n Nice a zawm

Everton midfielder Morgan Schneiderlin chuan Premier League club chhuahsanin Nice a zawm a, a man zat hi puanzar ni chiah lo mah se pound maktaduai hnih bawr vel nia ngaih a ni. 

Kum 30 mi midfielder hian January 2017 khan Manchester United aṭangin Everton hi a zawm a, a hunlaia a man zat pound maktaduai 24 aṭanga chhut chuan Merseyside club tan chuan channa a tling. 

Everton manager Carlo Ancelotti chuan, "Hliam vangin a buai ṭhin a, mahse a hun ṭha neihah erawh a khel ṭha ṭhin hle. Professional player a nih anga a hnathawhah Everton ami te chu an lawm em em vek a, a kal lehzelna turah duhsakna kan hlan a ni," a ti. 

Nice hi Arsenal legend Patrick Vieira enkawlna hnuaiah an awm a, league tihtawp takah khan pangana nichungin season an khar. 

Ancelotti chuan, "Schneiderlin hian France-a kir a duh ṭhin a, a duhna te kan tih hlawhtlinsak a ni. A hma hun atan duhsakna sang ber kan hlan," a ti a, a player chu ama duhthlannaa France lama kir a nih thu a sawi. 

France tana vawi 15 inlan tawh Schneiderlin hian English football-ah Southampton aṭangin a hming a chher a, Manchester United-ah hial lutin season hnih a khel hman - FA Cup leh FA Community Shield nomawi pakhat ve ve a chawi.