Arsenal mualah City chak zo lo

Arsenal-in an mikhual Manchester City lakah ṭum hnih an siphurh an sut a, Emirates Stadium-ah point khat an hlawh chhuak hram. Pep Guardiola nauten an goal neih an hum theih loh avangin Premier League hmahruaitu Chelsea hnaih theihna hun ṭha an neih an bawhpelh.

Pathianni zan inkhelah Man City tan Leroy Sane leh Sergio Aguero ten goal an khung a, Gunners goal pahnih hi Theo Walcott leh Shkodran Mustafi te khung a ni, 2-2 a inhnehtawk hi season thara Champions League khelh tum team pahnih tan result ṭha a ngaih theih tur a ni tawh lo ang.

Goal hnih ve ve
Inrinni zanah Chelsea an chak loh avangin City tan bei­seina siamtharna hun ṭha a ni. Midfielder Kevin de Bruyne-a ball pet ṭha tak dawngtu Sane-a'n minute ngana lekah goal hmahruai khung. Germany international Sane hi defender tlan chak Hector Bellerin-a'n a dan theih loh hnuah keeper David Ospina paltlang turin a tan hna a harsa lo hle, City an phur zual.

Belgium international Bruyne a hmuhnawm zui a, an goal hnihna khungtu a nih loh chhan chu goal ban vang chauh a ni. Spanish midfielder David Silva ball pet ṭha zet chu Ospina-a'n a dan sak, hliam vanga chawl mek Petr Cech hmun luahtu Colombia keeper a rintlak.

League table-a parukna Arsenal tan mahni khelmuala chak loh a thiang tawh lo, chawlhlawk hma minute nga la awmin Walcott-a'n an si phurh a sut, mah se an lawm chhung a rei lo. Goal an khung aṭanga minute hnih hnu lekah Aguero chuan sir deuh tak aṭangin a hlap lut. Silva goal khung tur dan saktu Gunners keeper Opspina-a'n a hna a thawk ṭha tawk lo.

Arsenal hian hliam vangin an defender rinrawl Laurent Koscielny an chan zui, chawlh­­­lawk hnuah si khat phur sa Gunners hi goal dang chhuah belh thei dinhmunah an ding. Nipui transfer laia an lakluh Mustafi-a'n corner aṭanga ball rawn kal tauh lutin an si phurh a sut. City tan Aguero-a'n chakna goal khung theihna hun ṭha a neih ṭum hnih a bawhpelh a, Arsenal defender Nacho Monreal-a'n hand ball vanga penalty a chawi lo chu a vannei hle bawk.

Buaina reh lo
Arsenal hi an league match khelh hnuhnung panga aṭanga vawi li tlawm an ni, City nen an inkhelh hma leh inkhelh lai ngei pawhin manager Arsene Wen­ger bang tura nawrna thawm ri leh thuziak hmuh tur a awm. Gunners hi table-ah parukna an ni, Champions League khel phak chin palina City an tluk lohna chu point sarih a ni, Wenger-a naute hi match khatin an khel tlem thung.

Arsenal manager Wenger chuan, "Palina dinhmun inchuh­na hautak tak kan hmachhawn mek, hetiang hun harsa paltlang tur hian tunhma lam khan tawnhriat ka nei hnem tawh," tiin a sang pali zinga tel turin a la inringtawk hle.

Season tawp rual a contract tawp ve tur Wenger chuan sawi chhunzawmin, "He club hi ka hmangaih, he hmunah hian engtiang chena rei nge ka awm dawn a la chiang lo. Ka hma lam hun tur chu keiman ka hre chiang, puanzar a ni thuai ang," a ti.

Hun ṭha a liam?
City-in Gabriel Jesus an chhawr thei lo chung pawhin tlarhmaah Sane, Aguero, Raheem Sterling leh De Bruyne te an la rem thei a, ven tham ṭhiau an ni. Arsenal lakah ball possession 56% chang chung goal khung tumin a zawnah vawi nga an pet thei. Khualmula goal hnih khung hi a chhe lo a, point hnih an hloh chhan chu fimkhur loh vangah a ngaih theih.

Premier League match 29 an khelh aṭangin City hian point 58 an hmu a, table-ah palina an ni. Pep-a nauten hmahruaitu Chelsea an phak lohna chu point 11 a ni mek - inkhelh hmabak match kua chauh a awm tawh avangin Spanish manager hian English football-a a season khat naah hian champion ni loin season thara Champions League khelh phak chu a tum tur a ni tawh.

Manchester City manager Guardiola chuan,"Ball kan in pass tam tawk loh kan tuar, a bik takin first half-ah khan tihsual kan ngah. Nilainiah Chelsea nen kan inkhel zui leh dawn, inbuatsaihna hun nei tam lo mah ila London-a ṭha taka inkhel turin ṭan kan la ang," a ti.