Carolina Marin hnehin Sindhu a champion

Pusarla Venkata Sin­dhu chuan Rio Olym­pic gold medal match-a a hneh loh Carolina Ma­rin hnehin Yonex Sun­rise India Open 2017 champion a ni. PV Sin­dhu hian India ram ngeia Badminton World Federation Super Series title a lak hmasa ber a ni bawk.

Pathianni zan Siri Fort Complex-a inkhelah khawtual nula Sindhu hian world number 2 Marin lakah harsatna a tawk lo, minute 47 chhungin 21-19, 21-16 in hnehna a chang.

Indian shuttler hian drop shot leh smash ropui tak tak lantirin game hmasa zawkah 6-1 in hma a hruai nghal a, game hnuhnung zawkah pawh 4-0 a hma a hruai leh theih mai avangin buaina nei loin a tlang. Sindhu leh Marin te hi vawi 10 an inhmachhawn tawh, ṭum nga ve ve an chak.

Kum 23-a upa Marin hi world champion vawi hnih a ni tawh a, European leh Olympic gold medal kawl lai a ni bawk - ani aia kum hniha upa laka Sindhu record hi a chhe lo hle.

Kum 21-a upa Sin­dhu hian nikum Rio Olym­pic-ah khan final lutin minute 83 zet an inkhelh hnuah Marin lakah a van­duai, silver medal a dawn hi India-in Olympic badminton inelnaa a tawn sang ber a ni tho.

World Champion­ship-a bronze medal pa­hnih dawng tawh Sindhu hi tun dinhmunah world number 5 a ni mek a, tun hnaia a hmasawn dan ngaih­tuah chuan Saina Neh­wal hnung zuia num­ber 1 ni thei tura beisei a ni.

Mipa singles final-ah Viktor Axelsen chuan minute 36 chhung lekin Tien Chen Chou chu 21-13, 21-10 in a hneh, Denmark tlangval tan India Open a vawi khat champion-na chiah a ni ve bawk.

Mipa doubles final-ah Indonesian pair Marcus Fernaldi Gideon leh Ke­vin Sanjaya Sukamuljo ten Ricky Karandasuwardi leh Angga Pratama te ṭang­dun 21-11, 21-15 in an hneh. Hmeichhe doubles champion chu Japanese duo Shiho Ta­na­ka leh Koharu Yone­moto te niin mixed dou­bles-ah Siwei Zheng leh Qingchen Chen ten nomawi an chawi bawk.