Zarkawt hlau lo Mission Veng Rikin Pethani inlan zan?

Mizoram Super League Season 3 hmahruaitu Zarkawt BCA-in Amritpal Singh leh Yadwinder Singh te an nei a, zanin dar 7:45-a an hmachhawn tur Mission Veng Vikings-in Rikin Pethani chhawr hman ngei an tum. Tualchhung bas­ketball ngainatute tan Hawla Indoor Stadium pan hun a ni.

Pethani a te lo!

Zarkawt BCA-in Amritpal Singh san zawng hi feet ruk leh inches 11 a sang niin an chhal a, Hawla Indoor Stadium mawi tawh zingah lian ber a ni. ONGC player Amritpal dang turin palian tho neih a ṭul a, Mission Veng lamin feet ruk leh inches kua a sang Rikin Pethani an be fel tawh a, amaehrawhchu nimin ruahsur vangin thlawhtheihna a ṭum thei lo a, vawiinah a rawn thlen theih beisei a ni.

March thlaa neih zawh tak Federation Cup-ah Amritpal leh Yadwinder Singh telna ONGC an champion a, an hneh chu Pethani telna IOB a ni. Vikings lakluh Pethani hi IOB-ah rinrawl a ni a, India tana feh chhuak fo tawh niin ṭhat pui tham player a ni.

Dunk mawlh kha

Zarkawt BCA coach Lalruat­fela chuan, "Mizo hlanga Tuikual South kan hneh khan minti phur a, Khatla TBL kan hmachhawn ṭuma Amritpal-a'n dunk nghal khan minti phur leh em em bawk. Tunah hian result nei ṭha zawk kan ni a, no. 1 (Khatla TBL) leh no. 2 (Tuikual South) kan hneh tawh a, no. 3 (Mission Veng Vikings) hi chu kan hmachhawn tawh pahnih aiin a awlsam tawk turah kan ngai. Amaherawhchu inthlahdah thei kan ni lo," tiin chak a inbeisei thu a sawi.

BCA boss hian Amritpal-a dunk-in team boruak a tih nun thu Vanglaini palai a hrilh a, Punjabi tlangval hian amah ang bawka palian Rikin Pethani a dunk khum chuan en a man hla dawn a, chu chu thil thleng thei a nih rualin hemi letling zawng chiah hian a thleng thei bawk.

Vikings hi Mizo zinga MSL-a dunk hmasa ber Lalrina Renthlei khelhna a lo nih lehzel bawk avangin zanin inkhel entute hi an vanduai viau a ni loh chuan dunk an hmu dawn.

BCA hmaah Michael F-a

MSL thlir ṭhin chuan awlsam takin Zarkawt BCA jersey haa Michael F. Lalawmpuia chevel an mithla theih ang. Tun season-ah erawh Ramhlun North tlangval Michael F-a hian Vikings jersey a ha tawh a, Zarkawt BCA hmaah a theihna phochhuah a duh dawn.

BCA-in Michael F-a thlak nan Zonunsanga an nei a, Hollow aṭanga Zarkawt club zawmtu Zonuna hi team tichaktu a ni nghal. Zaninah erawh Michael F-a leh Zonuna ten court-ah roreltu nih an inchuh dawn a, inkhel hmuhnawmna an belhchhah ang.

Mipui an pawimawh

Vikings coach Reuben Lal­chhan­dama chuan, "Kan vawi hnih khelh tawhah a vanduai zawkah kan ṭang ve ve a, kan tana ṭha lo tur zawkin thutlukna siam ve ve a ni. Hei vang hian min ti phur tur chuan state pawn player hi kan mamawh a, Rikin Pethani hi kan chhawr hman phawt chuan player-te leh mipui pawh an phur ang," tiin phurna thar an neih a beisei thu a sawi.

Mission Veng Vikings-in ṭan­tu an nei ṭha ṭhin a, Zarkawt BCA-in tun season-ah ṭantu an nei ṭha bawk.

BCA coach Afela chuan, "Kumina ṭantu kan nei ṭha hi a lawmawm takzet a ni. Kan player-te hi chak duhin an tuihal a, min ṭantute tana lawmna siam hi kan duh a ni," tiin Zarkawt club ṭan turin an supporter a sawm ve bawk.