Zaninah United leh Everton
Old Trafford-ah Manchester United-in Inrinni zan khan West Brom lakah goal an khung thei lo a, zanin dar 12:30 hian Everton an hmachhawn leh nghal dawn. Goal khung khawl Zlatan Ibrahimovic chhawr theihin a awm tawh a, Premier League inkhel hi Star Sports Select HD 2-ah a en theih ang.
Beisei pha lo
Jose Mourinho-a'n Manchester United a enkawl tirhin champion a duhthu a sawi nghal a, chumi tithei tur chuan sum pek a ni bawk. Amaherawhchu khawvel player manto ber kawltu Red Devils hian March thla zawh rualin league nomawi chu sawi loh Champions League khelh beiseina a tawp tihtih a, an chunga awmte result-ah a innghat tawh.
Portuguese manager Mourinho chuan, "Everton leh a zawha kan hmachhawn tur Sunderland-ah theihtawp kan chhuah dawn. Kan result aṭangin kan hmalam hun kan thlir ang a, chhiarkawp dana palina dinhmun hauh theihna kawng a tawp a nih chuan Europa League milin league lamah pawh player ka thlang ang. Kan tan chuan quarterfinal-a Anderlecht nen kan inkhel tur hi a pawimawh takzet a ni," tiin an dinhmun leh an hmathlir a sawi.
Manchester United boss Mourinho hian Europa League champion-in Champions League an khel dawn tih a hria a, season thara Europe club tana inelna sang ber khelh a tumruh hle.
Everton pawh
Everton-in Southampton duhlai Ronald Koeman lalutin result ṭha zawk an beisei a, amaherawhchu club lian lakah an duap leh ṭhin. Inrinni khan Toffees hian Merseyside Derby-ah Liverpool chu Anfield-ah 1-3 in an hneh lo a, striker chhuanvawr Romelu Lukaku dah ṭhatin a awm.
Liverpool legend Jamie Carragher chuan, "Everton nomawi chawi hnuhnun ber kum 1995 aṭang khan derby match vawi 47 a awm tawh a, vawi sarih chiah an chak. An rilru put hmang an thlak a nih loh chuan nomawi hi an hlat a ni," tiin a sawisel a, league-a goal 21 khung tawh Lukaku chu hun pawimawhah a che ṭha tawk lo tiin striker ṭha berte zinga chhiar tel tlak a nih loh thu a sawi lang bawk.
Everton hian Premier League bikah United vawi 49 an hmachhawn tawh a, vawi riat chiah an chak. Red Devils erawh vawi 33 an chak thung a, vawi riat dang an inhnehtawk. Nikum December thla khan Everton hian an khelmualah United hi 1-1 in an draw a, hetiang result hi a thleng nawn a nih chuan Jose Mourinho hote an lawm lo ang.
Pogba telin?
Zlatan Ibrahimovic bakah midfielder Ander Herrera-a'n hremna a hmang zo a, amaherawhchu Juan Mata, Phil Jones leh Chis Smalling te an inlan thei dawn lo. French midfielder Paul Pogba erawhin training a zawm tawh a, Everton a hmachhawn a nih pawhin mak lo ang.
Everton hian right-back Seamus Coleman chu ke ruh tliak vangin an chhawr thei lo a, Argentina centre-back Ramiro Funes Mori-a'n a khupah hliam a tuar a, manager Koeman-a'n United midfielder hlui Morgan Schneiderlin a chhawr thei lo bawk ang.