AFC Cup Bengaluru leh Bagan inlan dawn
Asia khawmualpuia club inelna sang ber dawttu AFC Cup chu vawiinah khelh a ni dawn a, Indian club ṭha pahnih Bengaluru FC leh Mohun Bagan an inlan dawn. AFC Cup finalist nilai Bengaluru hian vawiin tlai dar 4:30-ah Maziya S&RC chu Maldives-ah an lenchilh dawn a, Bagan chuan zan dar 7:00-ah Bangladesh club ṭha Dhaka Abahani an mikhual thung ang.
Blues beiseina
Bengaluru-in I League-a an match hnuhnung berah Mohun Bagan chu 3-0 ngawtin an ngam lo a, coach Albert Roca chuan champion an beisei tawh lohna inelnaa players chhawr hah aia AFC Cup an khelh tur a thlir vang a nih thu a sawi - group stage aṭanga team pakhat chauhin knockout stage an luh dawn avangin Bangalore club-in season hmasaa an sulhnu ropui chhunzawm an duh chuan chetsual a thiang lo.
Albert Roca-a naute zingah I League-a Mohun Bagan hmachhawn lotu Sunil Chhetri leh Eugeneson Lyngdoh chet
ṭhat a ṭul dawn a, Udanta Singh theihna leh thiamna enin Manipur winger hi a ṭangkai viau bawk ang. Blues tan Lalthuammawia Ralte nek chhuaktu Amrinder Singh bawkin si ban a nghah a rinawm a, English defender John Johnson chu tlarhnung innghahna tur a ni.
Maziya belchiang ang
Bengaluru hmachhawn tur Maziya Sports & Recreation Club hi Maldives club inelna sang ber Dhivehi Premier League champion lai an ni a, AFC Cup-a an match hmasa berah Dhaka Abahani chu 2-0 in an hneh tawh. Green Boys tia hminglem an pek club hian Bengaluru nen vawi hnih an inhmuh tawhah an tlawm ve ve.
Macedonian coach Marjan Sekulovski kaihhruaina
hnuaia khel club tan Serie B club Frosinone defender hlui Andrei Cordos leh Serbian defender Milos Kovacevic chu tlarhnungah innghahna an ni dawn a, an hnunga ding turin Kyrgyzstan international goalkeeper Pavel Matiash a la awm cheu bawk. Bengaluru tlarhnung tan Abdulla Assadhulla chu hnawksak tura ngaih a ni a, kum 2014 leh 2015-a Maldives Player of the Year hi season thum chhung an ram league-ah a zawnin top scorer a ni tawh.
Champion tum Bagan
Mohun Bagan coach Sanjoy Sen-a'n an league match hnuhnung bera Bengaluru an hneh ṭumin, "Inelna kan telnaah chuan champion vek kan duh a ni," tiin a sawi a, an match hmasa bera Indian derby-ah Bengaluru an hneh loh bawk avangin zaninah hnehna chan ngei an tum ang. Sanjoy-a'n league match hnuhnung berah AFC Cup thlir chunga bench-ah Jeje Lalpekhlua leh Balwant Singh a dah thu a sawi a, zaninah Jeje a inlan ngei a rinawm.
Mizo tlangval Jeje-a'n season hmasa AFC Cup-ah goal sarih khungin Indian player zinga khawmualpui inelnaa season khata goal khung hnem ber record a siam a, tun season-ah goal hnih a khung leh tawh bawk. Hnahthial tlangval hian, "Season khata Asia huap club inelnaa Indian player goal khung hnem ber ka ni tawh a, Pathian zara ka dam chuan a pumpuia goal khung hnem ber nih ngei pawh ka tum a ni," tiin Vanglaini palai hnenah a lo sawi tawh a, goal 14 khungtu Bhaichung Bhutia lehpel a tum.
Tute nge Abahani?
Sky Blues tia hriat lar club hian season hmasa khan Bangladesh Premier League leh Federation Cup nomawi an chawi kawp a, BPL nomawi chawi turin ngam loh an tawng lo - club ṭha an ni tih a chiang. AFC Cup-a an match hmasa berah erawh Maziya an ngam lo a, hei vanga zuam ngawt chi erawh an ni dawn lo.
Bangladesh club tan Nigerian striker Emeka Darlington chu tlarhmaah innghahna a ni dawn a, Cardiff City striker hlui leh Wales tana Under 17, 19 leh 21-ah pawh lo inlan tawh Jonathan Brown hi Bagan tlarhnunga Pritam Kotal leh Anas Edathodika te ho tan ven uluk ngai tur a ni bawk. Bagan tana hriat nuam tur erawh Ghanaian defender Samad Yussif chu visa fel thei lo avangin a zin ve thei lo a, Kolkata club tlarhma tan hna a awlsam sawt ang.