Roger Ropuia a Ropui Kuminah nomawi pathum a nei ta

Tennis player piang tawh zinga ropui ber a chhal ngam Roger Federer chu kum 35 a tlin hnuah pawh a thiamna thup theih a la ni lo. Swiss thiampuipa hian Pathianni zan khan Rafael Nadal hnehin Miami Open-ah a champion - Federer hian kuminah nomawi pathum a chawina a ni a, title pathum la tur hian thla thum chiah hun a mamawh.

Tennis Center, Crandon Park-a inkhelah Federer hian darkar khat leh minute 34 chhungin 6-3, 6-4 in hnehna a chang. Set pahnihah hian vawi khat ve ve Nadal-a service a chhuhsak a, tun hma a ṭhat lai ang bawkin a service a hum tluan bawk. Miami Open hma hian Australian Open leh Indian Wells-ah Nadal hnehin a champion vek bawk a ni.

Tun season-ah Federer hian match 20 hnehna a chang tawh, a chetsual awmchhun chu Dubai Open-a Evgeny Donskoy a hneh loh chiah kha a ni. Kum 2006 khan a match hmasa 34 aṭangin vawi 33 zet hnehna a chang thei a, a vanglaia a khelh ṭhat tluan lai nen khaikhin theih tur khawpin a khel chhuak leh mek.

Tennis a khelh hun chhung­in Federer hian nomawi 91 a chawi tawh a, ATP Masters 1,000 title 26 a lakna chiah a ni bawk, Grand Slam champion hnem ber hian Masters 1,000 bikah chuan Novak Djokovic (30 titles) leh Nadal (28 titles) te dinhmun erawh a phak rih lo thung.

Grand Slam vawi 18 cham­pion tawh Federer chuan, "Rafa ka lawmpui che, a chhan chu kuminah ropui takin i khel chhuak leh a ni. Kum 2004 kan intawn hmasak khan naupang mai ila ni a, chumi hnuah player ropuiah i chhuak. Nang nen hian inkhel hriat reng tur tam tak kan hnutchhiah a, match ṭhenkhat erawh min ti hrehawmtu a ni fo bawk," tiin Nadal chungchang a sawi.

Player ropui pahnihte hi vawi 37 an inhmachhawnna a ni a, Spain tlangval Nadal hian vawi 23 hnehna chang tawhin record a nei ṭha zawk. Mahse, Federer hian a vanglai pawha a hneh hleih theih loh Nadal hi an kum tam hnuah a hneh thei! A bik takin kuminah vawi thum a hneh tawh, an vanglaia an thahrui neih ang an neih loh hnuah thiamna nei sang zawk a ding chang tih a hriat theih.

Grand Slam vawi 14 cham­pion tawh Nadal hi Miami Open-ah hian a vanduai thei hle, final vawi nga a khel tawh a, a chak lo vek. A khelh dan enin a chak ṭhat lai ang maiin a la che thei a, a vanneih ni nisela chuan nomawi chawi thei tur a la ni ve bawk.

Kawng harsa

Miami Open bikah Federer hi 2005 leh 2006 khan a lo champion tawh bawk, tun ṭumah hian lungthu a kim chiah. Kumin Mimai Open-ah hian hlawhtling turin kawng awlsam a zawh lo. Round of 32-ah forehand nei ṭha chungchuang Juan Martin del Potro a paltlang hnuah Tomas Berdych-a'n match point vawi hnih a hmuh tawh a pawtthla thei.

Semifinal-ah Australian rawlthar ṭhang duang Nick Kyrgios chu set thumnaah a paltlang hram a, final thleng hian match ruk khelin heng zinga match pathumah hi chuan a chak hram vek tih theih a ni. Chutihrualin tun hnaiah world number 10 aia sang player a hmachhawn hnuhnung 11-ah hnehna a chan vek avangin sawi nep theih a ni lo.

Federer chuan, "Ka inrin­tawk­na neih ka chhawr ṭang­kai a ni, player dangte nena khaikhin chuan thahruai ka ngah tawk lo tih ka hria, chuti chung chuan rilru huaisen tak ka nei tho," tiin a chak theih chhan a sawi.

Engtin zel...

Nikum khan Federer hian tennis a khelh hun chhunga a hun tawn hrehawm bera ngaih a tawng. A hnungzâng a tih nat hnuah a khup a hliam zui leh a, Wimbledon semifinal hnuah a inkhel zui tawh lo. Federer hian hun rei zawk inkhelh a duh vang leh season duhawm hman theih nan season chanve chung ngawt chu inenkawl nan a hmang.

Federer chuan, "Ka dama, ka hrilsel ṭha a nih phawt chuan tennis match ropui khel thei tur ka la ni reng. Mahse, hei erawh hriat tel a ṭul, kum 24 mi ka ni tawh lo, French Open hma chuan tun bak hi clay court tournament ka khel zui tawh rih lo ang," a ti.

Federer hian chawlh lak tum mah se vawi khat a champion tawhna, May 2 aṭanga khelh tur Roland Garros-ah erawh inlan a tum. Hetihrual hian tun hma lama a hlawhtlin tawhna clay court inelna ṭhenkhat - Monte Carlo Masters, Barcelona Open, Hungarian Open, Madrid Open leh Istanbul Open-ah te a hmel kan hmu dawn lo tihna a ni.