Arsenal-in point leh Auba an hloh

Mikel Arteta enkawl Arsenal chuan Crystal Palace mualah inkhel thunun chungin goal an nei hmasa, chak tura rinkai ni hman mah se goal an chhuah. Goal khat ve ve khunga an inhnehtawk bakah an captain Pierre-Emerick Aubameyang chu video assistant referee (VAR) hman a nih hnuah hnawhchhuah a ni.

Inrinni zan Selhurst Park-a Premier League inkhelah Gunners tan David Luiz, Mesut Ozil leh Alexandre Lacazette ten mawi taka ball an inpek kual hnuah Aubameyang chuan a hmawr bawkin chawlhlawk laiin 1-0 in hma an hruai.

Roy Hodgson-a'n inkhel chawhnu lamah a naute a fuih ṭha, striker Jordan Ayew-a'n minute 54-naah an siphurh a sut. Arsenal captain Auba-a'n ṭul lo takin Palace midfielder Max Meyer chu a kerek vei lam a tlawhsak a, referee Paul Tierney chuan yellow card a pe.

Yellow card-ah hian a la tawp mai lo, thil thleng hi VAR hmanga endik a ni a; Gabon international hi hnawhchhuah a ni, red card pek a ni hi a mak lo. VAR an duh lohna thuziak tar chhuaktu Palace lam chu an thil duh loh chhawrtu 

an ni thung. Player kim loa khel Arsenal tan Nicolas Pepe-a'n chakna goal khung theihna hun ṭha nei mah se a ban a pet per, ball rawn let changtu Lacazette pet chu keeper  Vicente Guaita-a'n a dansak. Hun tawp dawnah Gunners defender Sokratis Papastathopoulos chuan an lama goal lut tur chu line aṭangin a pet chhuak hman hram.

Arsenal manager Arteta chuan, "Premier League inkhel pawi-mawhah second hnih emaw, second nga chhung lek rilru kan pe lo zeuh a nih chuan goal kan chhuah mai ṭhin," tiin inthlahdah zeuh a pawi thu a sawi. Spanish manager hian VAR chu thil dik hmu chhuaktu a nih thu a sawi tel bawk a ni. Palace coach Roy Hodgson chuan, "Goal kan khung hnem tawk lo tiin min sawisel tih ka hria. Mahse, tunah hian match 22 khelh aṭangin point 29 kan hmu thei, kan dinhmun hi a lungawi thlak rih viau," tiin table-a pakuana nih chu a ṭhat rih thu a sawi.