Hoffenheim mikhual tur Bayern

Bundesliga hma­hruaitu Bayern Munich chu zanin dar 11:30 hian Hoffenheim khelmual Rhein-Neckar Arena-ah an lenglut dawn.

Carlo Ancelotti enkawl Bayern Munich hian Inrinni zan khan Augsburg 6-0 in an sawp a, striker Robert Lewandowski chuan hattrick siamin Bundesliga season kal laiah goal 24 a khung tawh. Bayern hian RB Leipzig lakah point 13 zeta hma an hruai fal tawh avangin an nomawi kawl lai humhim thei turin an dinhmun a ṭha tawh.

Tun season-ah Bayern hian league match khat chiah chak loh an la nei a, zanina an mikhual tur Hoffenheim pawh hi vawi hnih chiah chak lo an ni. Hertha BSC 3-1 a hneh hlim Hoffenheim hian season tharah Champions League khelh an tum mek - mikhual lakah chetsual a hun lo khawp ang.

Nikum November 5 khan team pahnihte hi Allianz Arena-ah an inhma­chhawn tawh a, 1-1 in an in­hnehtawk. Europe-a in­lan tumin champion tum an mikhual tur hi a hmuhnawm ang.