Granada sawptu Barca tan Neymar 100

Barcelona-in La Liga no­mawi an beiseina chhi nung turin Granada chu khualmualah 4-1 zetin an sawp a, injury time-ah Neymar chuan goal khungin Bar­ce­lona tana a goal 100-na chiah a ni.

Catalan club-in match khat hrem vanga inlan lo Lionel Messi tel lo pawhin an talbuai lo tih an pholang a, Neymar bakah Luis Suarez, Paco Alcacer leh Ivan Rakitic ten goal khat ṭheuh an khung.

Barca-in hmahruaitu Real Madrid an um zel a, Zinedine Zidane-a naute hian an mikhual Alaves chu 3-0 in an hneh ve bawk.

Barca tan Suarez

Inkhel ṭan aṭanga minute 44-naah Luis Suarez-a'n goal hmahruai a khung a, Granada goalkeeper Guillermo Ochoa lo tlan chhuak chu striker class sang a nihzia pholan nan a lo pet khum. Suarez hian goal hmahruai a khung hma hian bar a pet per a, Ochoa hian goal tur ni ngeia langah vawi hnih chu Suarez hi a dang bawk.

Segunda division lama tla thei dinhmuna ding mek Gra­nada-in tlawm an tum bik lo. Chelsea aṭanga loan-a an hawh Jeremie Boga chuan second half-ah an si phurh sutna goal a khung a, mah se Barca chhaih kawlhna goal mai a ni. Minute 64-naah Suarez bawk a inlar a, Liverpol striker hlui hian Grana­da defender ven karah Alcacer tan ṭha zetin a siamsak a, hliam vanga lakchhuah Rafinha thlaktu striker hian goal-ah a chantir.

Neymar = 100

Granada tan Watford aṭanga loan-a an hawh Uche Agbo chuan a yellow card pahnihna a hmuh avangin minute 82-naah hnawhchhuah a ni a, Granada an tho tawh lo. Barca-in players tam zawk an nih chhawr chhun­zawm nghalin Rakitic chuan goal thumna a khung a, Neymar-a'n injury time-ah a goal 100-na hmangin chak a nemnghet - Brazil captain hian heti zat goal khung tur hian match 177 a mamawh.

Kum 2013-a Santos aṭanga Barca zawmtu Neymar chuan, "Club tan goal 100 ka khung tling thei hi ka lawm a, ka khelhpui ka ṭhiante tan ka hlan a ni. Ka lawmna ber erawh hnehna kan chang kha a ni a, a pawimawh ber chu point thum kan hmu kha a ni," tiin a sawi a, tun season-a goal 15 khung tawhtu forward hian mimal hmingṭhatna aiin team result a ngai pawimawh zawk.

Neymar faktu Enrique

Barcelona coach Luis Enri­que chuan, "Neymar-a record hi en ila footballer ropui a nihzia a hmuh theih. Khawvela forward hlauhawm ber pawl a ni a, he club-in amah lalut tura thutlukna an siam kha thutlukna fuh ber pawl a ni. Barcelona tan goal 900 a khung tlin thlenga kan hmuh theih ka beisei, " a ti.

Season tawpa Barca chhuah­­san tur coach chuan sawi chhunzawm nghalin, "International game awm zawh hnu lawka inkhelh hi chu a hautak ṭhin a, players tam tak ram tana feh chhuakin an chau em em ṭhin. Mahse, zaninah erawh kan khel ṭha takzet a ni. Bul kan ṭan ṭha a, second half-ah an si phurh rawn sut zawk mah se kan insiamṭha nghal thei a ni," a ti a, a naute khelh danah a lawm hle.

Real chak chiang

Madrid-in an mikhual Alaves lakah ṭhat an chhuah duh lo a, Karim Benzema, Isco leh Nacho te goal khat ṭheuh khung hmangin 3-0 in hnehna an chang. Alaves-in goal hmasa ber an chhuah hnuah Deyverson leh Edgar hmangin si phurh sutna hun ṭha nei mah se an chance neih chhawr theih loh rah an seng a, Real-in minute 85 hnu lamah goal hnih khungin an chak an nemnghet.

Real boss Zinedine Zidane chuan, "Kan goal hnihna kan khung hma khan kan talbuai deuh a, mah se Ronaldo-a'n Isco goal khung tur a siamsak hnuah khan kan hna chu chinfelin a awm," tiin a sawi a, hliam vanga minute 11-na leka lakchhuah ngai Raphael Varane hliam chu ngaihtuahawm a nih a rin loh thu a sawi nghal bawk.

Goal khung hnem

La Liga-ah club leh club inum boruak piah lama ngaih­ven hlawh ṭhin chu top scorer dinhmun luahtu a ni - Lionel Messi leh Cristiano Ronaldo awm vang a ni a, ngaihven loh theih a ni lo. Pathianni zana inlan lo Messi-a'n tun season league match-ah goal 25 a khung tawh a, assist vawi sarih nei tawhin minute 82 dana goal khung zel ang a ni.

Luis Suarez-a'n goal 23 khung tawhin assist 10 a nei bawk a, tun season Europe top five league-a goal leh assist 10 aia tlem lo nei kawp hmasa ber a ni. Uruguayan striker hian minute 95 dan zela goal khung ang a ni a, a hnuai chiah­ah hian Ronaldo a awm - Real chhuanvawr hian goal 19 khungin assist vawi sarih a nei tawh a, minute 106 dana goal khung angin an chhut.