Higuain leh Juve chelhtu Napoli

Pathianni zan Serie A inkhelah Juventus striker Gonzalo Higuain chuan Turin club jersey ha chungin a club hlui Napoli chu a vawi khat nan Stadio San Paolo-ah a lenchilh a, goal shot vawi khat chiah neiin a khung lo. Juve midfielder Sami Khedira goal khung chu Napoli captain Marek Hamsik-a'n sutin 1-1 in an inhnehtawk.

League table-a pahnihna AS Roma chuan Inrinni zan khan Empoli 2-0 in an lo hneh tawh, league match khelh hmabak pariat la awmah Massimiliano Allegri enkawl Juve hian point rukin hma an hruai mek, an nomawi kawl lai humhim tura rinkai an la nih chhunzawm zel.

Italian club Napoli-in Real Madrid aṭangin Gonzalo Higuain an lalut a, Argentine striker hian season hmasa khan Serie A match 35 a khelh aṭangin goal 36 a khung - Napoli lawmna thlentu hian nipui transfer laiin Juventus a zawm san daih. Naples lamin Higuain hi an ngaidam thei lo, an khelmuala kir lehna hmasaah hian amah an huatzia chu lemziak hmangin an lantir nasa hle.

Juve manager Allegri chuan, "Kan elpui leh team hautak lakah point kan hmu theih avangin champion turin beiseina kan nei sang zel. Kan khelmualah match li khelh tur kan la nei a, hetiang zat bawk hi khualmualah a la awm bawk - thil chiang sawi theih erawh a la ni lo," a ti.

Napoli manager Maurizio Sarri chuan, "Goal khat ve ve khungin kan inhnehtawk, inkhel kha ngun taka kan en erawh chuan chak phu zawk kan ni tih a hmuh theih. Ka naute khan ka duhthusamin an khel lo chung khan Juve kha an chhaih mangang hle," tiin a sawi.