Scotland-ah Celtic an champion

Celtic-in Scottish Pre­mier­ship-ah match riat khelh tur la nei mah se Pathianni zan khan Hearts chu 5-0 ngawta an sawp avangin champion nomawi an chawi a, season ruk chhung a zawna league champion an nihna a ni ta.

Brendan Rodgers-a naute tan Scott Sinclair chuan hattrick a siam bakah Stuart Armstrong leh Patrick Roberts ten goal khat ve ve an thawh bawk a, match 30 an khelh tawhah tlawm hmel an la hmu miah lo - an hmabak match riatah Celtic hian tlawm hmel an hmu lo a nih chuan Scottish Premiership-a match 38 tlawm hmel hmu loa nomawi chawi thei hmasa ber an ni ang.

Scottish football-a tlawm hmel hmu loa league nomawi chawi thei chu Celtic (1897-98) leh Rangers (1898-99) an ni a, hetih hunlai hian league match 18 chiah an la khel thung.

Rodgers a hlim

Celtic boss Rodgers chuan, "He hmuna ka lokal khan ka hna hmasa ber chu a ṭha thei ang bera nomawi chawi kha a ni. Season duh­awm tak kan hmang a, mah se tunah hian bul kan la ṭan chauh a ni. Hmachhawp tam tak kan la nei a, chu chu a phurawm lai ber chu a ni," tiin league nomawi-ah duhtawk a tum lo.

Scottish club hi domestic treble chawi thei dinhmunah an ding mek. November khan Aberdeen hnehin League Cup an chawi tawh a, Scottish Cup semifinal-ah Rangers hmachhawn an la hmabak bawk. Scottish domestic treble chawi thei hnuhnung ber chu Rangers (2002-03) an ni a, Celtic-in domestic treble an chawi hnuhnung ber chu 2000-01 kha a ni bawk.

Mahse, Liverpool boss hlui chuan, "Treble chawi lam kan sawi ngai lo. Min ṭantute chuan duh leh treble champion chu lo suangtuah se la, keini chuan ṭha taka khelh hi kan tum zel ang," tiin pressure insiam a duh lo.

Wenger thlak tur?

Arsenal boss Arsene Wenger dinhmun a la chiang thei lo a, Brendan Rodgers hi Gunners enkawl tura hming lamrik zinga mi a ni. Mahse, Swansea City aṭanga hming chhertu boss hian Celtic-ah hun tam zawk hman a inbeisei thu a sawi a, Liverpool midfielder hlui Dietmar Hamann chuan, "Arsenal hmunruak a awm a nih phawt chuan Rodgers hi a langsar khawp ang," tiin a lo sawi ve mek bawk.

Rodgers hian Champions League a thlir leh der tawh a, "Champions League-a ṭha taka khel tur chuan players lakluh belh kan mamawh. He team hian ṭha takin kan khel ṭhin ngei a, mah se chutihrual chuan mamawh tam tak kan la nei a ni," a ti.

Rodgers-a hnathawh

Northern Irish pachal Rod­gers hian Celtic a en­kawl tirh khan Carlton Cole, Anthony Stokes, Colin Kazim-Richards leh Stefan Scepovic a chhuahtir vek a, transfer-ah a chesual lo chiang hle.

Fulham aṭanga a lakluh Moussa Dembele chuan tun season-ah goal 32 a khung tling tawh a, kum 20-a upa winger hi Europe-a rawlthar langsar ber pawl a ni der tawh. Hei mai a ni lo, Aston Villa aṭanga a lakluh Sinclair chuan goal 21 a khung tawh bawk.

Celtic striker hlui Chris Sutton chuan, "Rodgers hnathawh hi a ropui a, fak a phu a ni. He hmun a lo kal tirh khan pressure a sang em em a, Celtic fan-ten thil ropui hmuh an inbeisei. Rodgers hian an beisei ang ngeiin hna a thawk a, player khelh dan a thlak a, player ṭha zawk a lalut a, he team hi an ṭha tawh takzet a ni," tiin match 30-a point li chiah la hloh manager a fak.