Napoli leh Cagliari an chak

Thawhlehni zan Serie A inkhelah Napoli chuan Verona 2-0 in an hneh a, inkhel dangah Cagliari chuan table mawngphah lama mi SPAL chu 1-0 in an hneh bawk.

Coppa Italia champion hlim Napoli tan Arkadiusz Milik leh Hirving Lozano ten goal khungin, khualmuala hnehna chang turin harsatna an nei lo. Point 42 hmuin table-ah parukna dinhmun an luah.

Napoli manager Gennaro Gattuso chuan, "Hma kan sawn, player ten inrintawkna an nei sangin an khel ṭha ṭhin takzet a ni. Goal khung theih a pawimawh a, chutiang chiah chuan a venhim pawh a ngai, kan in khairual ṭha rih hle," a ti.

Gattuso enkawl Napoli hian Serie A season hmang fuh vak lo mah se Juventus hnehin Coppa Italian nomawi an chawi. Cup inelnaah hian a tawp thlengin goal khat bak an chhuah a, tlarhnung phui chu an chakna chhan lian tak a ni zel.

Inkhel dangah an match hnuhnung 12 zeta chak ni hmel hmu lo Cagliari tan kawl a eng ve ta. Anmahni ang bawka tlak hlau SPAL an lenchilh a, hun tawp hma chiahin Giovanni Simeone chuan goal awm chhun tauh lutin point thum hlu tak an sual chhuak.