Mbappe kan duh tawh lo - Real President
Real Madrid president Florentino Perez chuan an club zawm tura an hmin zawh tak loh Kylian Mbappe an duh tawh loh thu a sawi a, "Hmana Mbappe kha a ni tawh lo," a ti!
European champion hian nipui transfer lai khan Mbappe hi lakluh an tum a, mahse, a club khelhna Paris St-Germain chuan awiawh loh khawpa sum tam an kawhhmuh avangin French club-a cham a thlang.
Perez chuan, "Kan hnena rawn kal tum Mbappe kha chu tuna inhmuh Mbappe hi a ni lo a, tuna mi hi chu PSG-a a cham ka duhpui zawk. Lakluh kan tum Mbappe kha chu beiseina neitu a ni," a ti a, French striker chuan a duhthusam tihhlawhtlin aiin sum a thlan zawk thu a sawi.
Hetihlai hian La Liga chuan Manchester City leh Paris St-Germain chu UEFA hnenah a lo hek ve mek bawk a, Spanish top flight league chuan club pahnih hi UEFA-in a Financial Fair Play dan a neih bawhchhiaah an puh a ni.
Mbappe duhthusam
French forward Mbappe hian PSG-a cham a thlan khan contract-a ziah manah pound maktaduai 100 bawr vel a dawng nia sawi a ni a, thla khatah pound maktaduai 4-5 inkar a hlawh dawn bawk - a tam tham hle.
Kum 23 mi forward hi PSG chuan club-ah thuneihna sang zawk an pe nia sawi a ni bawk a, club player lakluh, coach leh sporting director chenin thu a nei dawn niin khawthlang media-te chuan an tarlang.
Perez chuan, "Mbappe-a'n a duh ber chu Real Madrid tana khelh a ni a, mahse, nikum August khan lakluh tum tawh mah ila, PSG lamin chhuahtir an phal tlat lo. Real tana khelh a duh thu a sawi reng ṭhin a, mahse, a hnu lawkah a thutlukna a sut a ni.
"Vawiina Mbappe hi chu Real-a lakluh ka tum kha a ni lo a, midang daih, a duhthusamte thlak danglamtu zawk a ni," a ti a, French striker chungah rinna nghah nawn a harsat.
Real aia ropui
Mbappe contract-a an inremna thlir ila, an pawisa pek ang zat pe thei club tam zawkin thuneihna a neih tur zawng zawng nen hi chuan kawl loh an duh zawk ang - mahse, PSG erawhin chelh ngei an duh miau a, an in chelh hlawhtling.
Perez chuan, "Thil tam tak a hmaah chhawp a ni a, a inthlak danglam a ni. Real Madrid-ah chuan club aia ropui zawk an awm a thiang lo," a ti a, PSG-in Mbappe an tiam ang chu an tiam ve theih loh thu a sawi.
Real President chuan sawi zawmin, "Player ropui tak a ni a, midang ai pawhin a hlawhtling thei ang, mahse, football hi thawhhona hmanga khelh chi a ni a, kan club chuan thlak theih loh kalphung nghet leh ngaihhlut zawng kan nei a ni," a ti.
Mbappe hian PSG-ah kum thum atan contract ziak mah se, Santiago Bernabeu a la pan mai theih thu a lo sawi tawh a, "A la tawp lo," tiin a sawi - mahse, Real zawk hian an thinlung hliamtu hi an duh tawh kherin a rinawm loh.
Haaland duh lotu
Real Madrid hi nipui lai khan Erling Haaland nen sawizawm an ni bawk a, mahse, Norwegian striker hian Manchester City a pan bawk - La Liga leh Champions League nomawi chawi kawp thei Real-in an player duh pahnih an chang lo.
Mahse, Perez chuan Karim Benzema an neih vanga Haaland chu la lo an nih thu a sawi a, Real President chuan, "Khawvela number 9 ṭha ber kan nei a, bench-a ṭhu tura Haaland lakluh kan tum lo a ni," a ti.
Perez chuan sawi zawmin, "Player naupang kan kawl mekte nena team din thar a, inthuamṭhat kan ngaihna laia inthuamṭhat bak khaw dang kan hawi tawh lo," a ti a, transfer liantham chu Real hian neih an tum tawh lo a ni mai thei.
Real hian Monaco aṭangin midfielder Aurélien Tchouaméni an lalut tawh a, kum 22 mi midfielder man hi euro maktaduai 100 vel thlenga sang chho thei tura tih a ni.
La Liga hekna
Real-in an player duh pahnih an chang lo a, Barcelona-in an sum hman thiam loh luat an tuar mek bawk - hetiang boruak karah hian La Liga chuan City leh PSG an hek a, club pahnih sum hman dan chu hrem ngei turah an ngai!
La Liga chuan, "Club pahnihte sum hmuh dan hi La Liga chuan a enchianin rinhlelhawm a ti a, an chet dan hi football hma hun a tan a him lo a, European club leh league dinhmun a tiderthawng a, ṭul loah thil man an tisang a ni," an ti.
Spanish top flight league hian PSG an hekna hi kar hmasa khan an thehlut a, Manchester City erawh April thla daih khan an lo hek tawh - La Liga president Javier Tebas chuan club pahnih hi a lo bei fo tawh a, anni erawhin an puhna hi an pha thung.
French chanchinbu lar L'Equipe chuan PSG hi UEFA chuan an sum che vel a thlithlai mek niin a sawi a, La Liga-in Arab sum ring club hausa pahnih a beihna hi a ngaihnawm chho zel dawn niin a lang.