Zo Keite a inpeih tawh

Indian boxing chanchina hming dai tawh ngai lo tur NT Lalbiakkima chuan Inrinni zan an inhnek tur atan a inpeih tawh thu Vanglaini a hrilh a, Siaha tlangval chuan, "A châkin ka châk tawh a ni," a ti.

NT-a hian June 18, Inrinni zanah Philippines boxer ṭha Jayson Vayson nen WBC Asia continental title an inchuh dawn a, an inhnek tur hmun hi Sheikh AL Maktoum Hall, World Trade Centre, Dubai a ni.

Siaha boxer hian nimin khan an inhnek tur atan Dubai khawpuiah media ho hmachhawnna a nei a, a fight tur Jayson Vayson nen pawh an inhmu tawh.

NT-a chuan, "Boxer ṭha tak a ni a, kan intiat tawk khawp mai. Boxer, kei aia record nei ṭha zawk leh tawnhriat nei ṭha zawk ka hmachhawn dawn a ni," a ti a, boxer pahnih hi attacking game khel ṭhin ve ve an nih avangin a hmuhnawm ang.

IBA intercontinental champion lai NT-a hi WBC Asia continental title fight nei tur hian a weight a sawn a, minimumweight (47.62 kg) aṭangin light flyweight (47.62 - 48.98 kg) ah a insawn chho a ni.

NT-a hmachhawn tur Jayson hi kum 24 mi a ni a, vawi 11 inhnek a hmachhawn tawhah tlawm a la nei lo - vawi kua chakin vawi khat draw result a nei a, vawi khat chu 'no contest' ah puansak a ni.

Zo Keite NT-a te inhnek tur hi main event a ni dawn a, Siaha boxer bakah hian Mizo boxer Laldingliana a inlan ve bawk ang. Tuipui boxer hian featherweight-ah Kazakhstan boxer Alimzhan Tursunov a hmachhawn dawn.

Mizo boxer ṭhate hlawh tur hi Zonet chuan nimin khan a puanzarna a nei a, NT-a hian US dollar 3,000 (Rs. 2,34,244.50) a hlawh dawn bakah PPV aṭangin share 10% a chang bawk ang. Dinga hian US dollar 1,500 (Rs. 1,17,122.25) a hlawh dawn a, PPV share 5% a nei bawk. He fight buaipuitu DJMC chuan 70% an chang ang a, Zonet-in 15% an chang ang.

Zonet chuan 'Countdown to the middleast crown series 4' tia hming an pek inhnek hi mipui en theih turin a pe chhuak dawn a, television lama en duh tan Zonet distributor hnenah Rs.100 pein a en theih ang a, online-a en duh tan Zonet Empai subscribe tute tan a en theih dawn bawk - Empai hi Rs. 199 aṭanga inṭanin a subscribe theih.

June 18, Inrinni zan dar 6:00 aṭangin inhnek hi a en theih dawn a, technical lama buaina awm thei a nih avangin en duh tan mahni veng Zonet distributor-te hnenah ngaihven a hun tawh.