LBS Suzuki All Mizoram Inter Village Football Zanin dar 8:00-ah a khuhhawnna

Mizorama football inelna lian, LBS Suzuki All Mizoram Inter Village Football chu zanin dar 8:00 hian Chanmari YMA Hall-ah a khuhhawnna neih a ni dawn.

Kick Off zan hian team tin aiawh pakhat ṭheuh tel tur a ni a, Zonet TV leh an YouTube channel-ah live-a pekchhuah a ni ang.

Co-Sponsor
He inelna lian hi LBS Suzuki chuan an sponsor a, co-sponsor tur pahnih - Tata Yodha leh Westside an awm dawn.

Yodha hi lirthei chhuak thar hralh tla tak a ni a, Zothan Autoworks, bawngkawnah loan-in an pe chhuak thei reng. Westside thawmhnaw dawr hi Chanmari (Ramhlun Road) lamah awmin India ram hmun dang aia man to bik loin thawmhnaw ṭha a awm reng.

Team 204
Inelnaah hian team 204 ngawt an tel a, khelmual pali Lammual, RG Stadium, MFA Ground (Sairang Dinthar) leh Lengpuiah khelh turin ruahmanna an siam.

MFA thuchhuah tarlan danin MFA leh DFA lamin club inelna a kalpui chhoh leh hnaih tawh avang leh registration hun hawn a nih dawn hnaih avangin inter village football hi a hma theia zawh tum a ni a, hei vang hian khelmual pali hman a ni ang.

Mizorama district 11 aṭangin team an tel kim vek. Aizawl District aṭangin team 103 an tel a, heng zinga 71 hi AMC area-a awm an ni. District dang aṭanga team tel dan chu Mamit (26), Kolasib (19), Serchhip (15), Saitual (13), Champhai (8), Khawzawl (8), Lawngtlai (6), Hnahthial (3), Lunglei (2) leh Siaha (1) te an ni.

Seeded an awm lo
Team 204-ah chuan team ṭha leh ṭha lo an awm a, champion tum aṭanga tel ve hrim hrim duh thlengin an awm. Player neih ṭhat dan a inang lo a, training neih rei dan a inang lo. Chutihrualin seeded siam tur a nih dawn chuan Mizoram pum huap veng leh khua inelna hnuhnung ber chu Red Ribbon Football 2012 daih a ni a, a hlui ta mah mah deuh.

Hemi a nih avang hian inelna buatsaihtu MFA chuan All Mizoram Inter Village Football Tournament-ah hian seeded a siam dawn lo. Chumi awmzia chu CYMA Football-a champion ngun ber Armed Veng leh NECS Cup champion ngun ber Ramhlun South pawh first round-ah an inkhel thei dawn tihna a ni.

Group khatah Central YMA Football-a champion tawh Armed Veng, Chaltlang, Chanmari, Dinthar, Electric Veng, Kanan Veng, Lengpui, Ramhlun South, Ramthar Veng, Republic Veng leh Zotlang te pawh an awm vek thei. CYMA Football-a champion tawhte hi Red Ribbon Football-a champion tawh Durtlang bakah team ṭha Bethlehem Vengthlang, Armed Veng South, Zemabawk North leh team ṭha dang ten an la belh thei bawk.

VC area pakhat aia tam inzawm khawm Serchhip Jt VC , Hnahthial Jt VC leh Siaha Vaihpi Jt. VC te pawh team ṭha zingah an tel thei a, chutihrualin tumpui a fuh loh chuan tla nghal thei an ni. Hemi a nih avang hian zanin All Mizoram Inter Village Football khuhhawnnaa draw neih tur hi a pawimawh a, inelna hmachhawn tur veng leh khua ten an thlir ṭhap ang.