Premier League fixture a chhuak World Cup an thlir
Khawvela league ngaihven hlawh ber Premier League chuan season thar atan fixture an ti chhuak a, Football Association lam ngenna ngai pawimawhin World Cup an dah pawimawh!
Thlasikah World Cup khelh a nih dawn avangin season laihawlah chawlh hman a ngai dawn a, hei vang hian November 12 match zawhah league chawlh a ni ang a, December 26-ah khelh ṭan leh chauh a ni dawn.
FA chuan World Cup-a England-in an neih ṭhat ber an thawhchhuahpui theih nan, November 12-ah hian Big Six te inhmachhawn lo se an duh a, an duh ang tak hian Premier League chuan fixture an siam.
Premier League hi ṭum dangah chuan August kar hnihna tawp lamah khelh ṭhin a ni a, kuminah erawh August 5-ah khelh ṭan tur niin, match hmasa berah Arsenal leh Crystal Palace an inkhel ang.
Round khatna
Premier League season thar, round khatnaah Big Six tia hming lem an pek Arsenal, Chelsea, Liverpool, Manchester City, Manchester United leh Tottenham Hotspur ten match hautak khelh tur an nei dawn lo.
Arsenal-in match hmasa berah Palace lenchilhin, Chelsea chuan August 6 zanah Everton an lenchilh dawn a, Liverpool chuan khualmualah kai thar Fulham an hmachhawn bawk ang.
Tottenham Hotspur-in season thara an league match hmasa ber chu an mualah an khel dawn a, Antonio Conte naute hian Southampton an mikhual dawn.
Ajax boss hlui Erik ten Hag hoa team dinthar tum mek Manchester United-in August 7 zanah Brighton & Hove Albion an mikhual dawn a, Manchester City-in West Ham an lenchilh dawn thung.
World Cup
Qatar-ah khua a lum avangin ṭum danga nipuia khelh ṭhin World Cup chu thlasikah khelh a ni dawn a, November 21-ah World Cup hi khelh ṭan a ni ang a, December 18-ah final khelh a ni ang.
Hetiang a nih avang hian Premier League pawh ṭum dang zawng aiin ṭan hma a ni a, season ṭan nana league champion leh FA Cup champion-in an khelh ṭhin Community Shield pawh July 30 zanah khelh a ni dawn.
Season hmasa kha chuan Community Shield hi August 7 zanah khelh a ni chauh a, Leicester City-in 1-0 in Manchester City an hneh - tun season-ah kar khat velin an khel hma dawn tihna a ni.
November 12 zanah Premier League club 20 an inlan vek ang a, World Cup khelh hmaa match hnuhnung ber an khel ang - December 18-ah World Cup final khelh a ni ang a, Krismas ruai ṭheh ni, December 26-ah league hi khelh chhunzawm leh a ni ang.
England lawmna
November 12 zanah World Cup hmaa league match tawp ber khelh a ni dawn a, he zanah hian Big Six club Arsenal, Chelsea, Liverpool, Manchester City, Manchester United leh Tottenham Hotspur zinga inhmachhawn awm ta se, a tuar tur chu England an ni.
Big Six club-te hian English player ṭha kawl an nei vek a, hei hi Football Association lam pawhin an hre kar a, World Cup khelh hnai tawh takah English player-te chau takin an inkhel ang tih an hlau.
Hei vang hian Premier League thuneitute chu November 12-a Big Six club-te inhmachhawntir lo turin an ngen a, Three Lions coach Gareth Southgate pawhin FA hnena an ngenna hi media hmaah a lo sawi tawh.
FA ngenna hi England tan a nih rualin, Big Six-ah ram pawn player ṭha an awm nual a, Premier League fixture siam danah World Cup khel tur ram dang pawh lawm tak tak an awm nual ang.
A chhehvel
FIFA chuan November 14-ah club-te chu an player zawng zawng chhuah vek turin thu a pe tawh a, a bik takin Premier League player-te chuan an league match hnuhnung ber an khelh zawhah an ram squad an zawm mai a ngai dawn.
Qatar-a World Cup khelh a nih hma hian league match khelh ni, ni 16 a awm dawn a, August thlaah matchday vawi nga a awm ang a, September-ah vawi thum awmin October-ah vawi ruk ngawt a awm dawn.
November-ah World Cup khelh a nih tawh dawn avangin matchday vawi hnih chiah a awm dawn a, World Cup khelh zui mai a nih dawn avangin football fans tan lunghnur lutukna tur erawh a awm lo.
Thlasik boruak vawt karah World Cup en tur a awm dawn a, hmun dangah buai phah viau mah se Mizoram aṭang chuan inkhel en nawm vanglai tak a ni thei thung.
Liverpool vs City
Premier League fan-te en châk ber zawt ta ila, Liverpool leh Manchester inkhel en châk an tam berin a rinawm - club pahnih hi October 15-ah Anfield-ah an intawng dawn a, April 1-ah Etihad Stadium-ah an intawng leh ang.
City hian khavwela striker 'hot' ber pawl Erling Haaland an lalut thar a, Liverpool hian European club liante chil tiputtu Darwin Nunez an lalut bawk - hei ringawt pawh Reds vs City en tichâkawmtu a tling.
Ocotber 1-ah inkhel hmuhnawm pahnih a awm dawn - Manchester derby hmasa ber Etihad Stadium-ah khelh a ni dawn a, London derby-ah Arsenal-in Tottenham an mikhual dawn bawk. Manchester derby hi January 14-ah Old Trafford-ah khelh leh a ni ang a, January 14-ah Spurs-in Gunners hi an mikhual ve leh dawn bawk.
Merseyside derby chu September 3-ah khelh nghal a ni dawn a, Liverpool-in Everton an lenchilh ang a, February 11-ah Everton hi an mikhual ve leh bawk ang.
Premier League First Round Fixtures
August 5, Zirtawpni Zan
Crystal Palace 12:30 AM Arsenal
August 6, Inrinni Zan
Fulham 5:00 PM Liverpool
Bournemouth 7:30 PM Aston Villa
Leeds United 7:30 PM Wolverhampton Wanderers
Leicester City 7:30 PM Brentford
Newcastle United 7:30 PM Nottingham Forest
Tottenham Hotspur 7:30 PM Southampton
Everton 10:00 PM Chelsea
August 7, Pathianni Zan
Manchester United 6:30 PM Brighton & Hove Albion
West Ham 9:00 PM Manchester City