Alves a chhuak dawn chiang

Barcelona chuan Dani Alves-a contract an pawtsei dawn lo a, Brazilian defender hian a vawi hnih nan Catalan club hi a mangṭha dawn - season tharah chuan club khelhna tur a melh a ngai dawn.

Nikum November thla khan Alves hian Barcelona hi a zawm. Nou Camp a chhuahsan aṭanga kum nga hnuah a kir leh a, tunah chuan hun rei lote a chamchilh hnuah a chhuak leh nghal dawn, a contract hi pawhsei theih ni mah se an pawtsei ta lo.

Alves hi kum 39 mi a ni tawh a, kumin tawp lama khelh tur World Cup-ah Brazil aiawh phak nih a la duh. Hei vang hian season thar chawhma lamah tal ṭha taka a la inkhelh a ngai, khawi lam nge a pan dawn erawh a la sawi chiang lo thung.

A chhuah tur thu sawiin Alves chuan, "Barcelona jersey hak nawn lehna remchang min siamsaktu chungah lawmthu ka sawi, ka tana a hlutna leh ka hlimzia in hrethiam phak lo hial ang.

"Thawnthu chu mawihnai taka tihtawp a ni ta a, tunah chuan chona thar dang hmachhawn a hun leh ta," tiin a sawi, a kum tam deuh tawh mah se a duh a nih phawt chuan khelhna tur club a la hmu dawn.

Barcelona tana kum riat a hman chhungin Alves hian Champions League nomawi pathum leh Copa del Rey pali a chawi - Catalan club tan La Liga nena nomawi a chawi zawng zawng chu 23 a tling hial.

Juventus leh Paris St-Germain a pan hnuah pawh a la hlawhtling chhunzawm zel. Tun hnaia Brazil-in Japan leh South Korea an hneh ṭum khan inkhel bul a ṭan ve ve, manager Tite-a'n a la rintawk miau avangin World Cup a khelh a rinawm.