Chanchin lawmawm a ni - Medvedev

US Open-ah Russia leh Belarus player an tel thei dawn a, world number 1 Daniil Medvedev chuan a nomawi humhim thei tura kawng an hawnsak chu lawmawm a tih thu a sawi a, an tan chanchin lawmawm bik a nih thu a sawi.

Ukraine nena an buaina vangin Russian leh Belarusian player-te chu Wimbledon-ah an inlan an phalsak lo. Grass court inelna lian nei lem lo, major tournament dang pathumah erawh chuan an tel phalsak vek an ni thung.

Russian tlangval Medvedev chuan, "Chanchin ṭha a ni, ka sawi lawk tawh ang khan ka inkhelh theihna hmunah chuan ka inlan zel ang. Nikum khan sulhnu duhawm ka lo nei tawh, nomawi humhim tura kir leh chu duhthusam a ni.

"Ka tan chuan US Open hi tournament pawimawh leh hlu bik a ni a, chuvangin kuminah pawh inlan ngei ka tum," a ti. Season hmasa khan final-ah Novak Djokovic hnehin a vawi khat nan Grand Slam title a la.

Wimbledon khel thei dawn lo mah se grass court inelna dangah chuan a inlan tho. Nilaini zan khan Halle Open-a a match hmasa a khel a, set hloh loin David Goffin chu 6-3, 6-2 in a hneh.

Kum 26 mi Medvedev chuan, "Wimbledon ka khel lo a nih chuan tournament dang pathumah a zawnin ka inlan thei dawn tho. A awlsam zawnga ngaihtuah chuan midang an inkhelh hah laiin chawlh hahdamna hun ṭha ka nei dawn bik tihna a ni," tiin a sawi.

Wimbledon-ah hian world ranking chhiar a awm dawn lo. Chuvangin Medvedev hi inlan lo pawh ni se, tournament an khelh zawh meuh chuan ranking-ah Djokovic aia a sanna chu tunhma aiin a sang zawk ang.