Golden Boy nominee 100 ti chhuak

Italian sports chanchinbu Tuttosport-in an thlan ṭhin Golden Boy dawng thei tur hming 100 tarchhuah a ni a, rawlthar footballer zinga hming langsar an kim hle. Nominee-a lang tur hian kum 21 hnuai lam nih a ngai a, Europe League sang khel pha an nih a ngai bawk.

Hming 100 thlanchhuah aṭang hian 80, 60, 40 leh 20-ah an inthlifim leh ang a, kumin kumtawpah chawimawina dawng tur hi puan a ni ang.

Thlanchhuahte chu
Barcelona-in player panga ngawt an thawh a; Alejandro Baldé, Ansu Fati, Gavi, Nico leh Pedri te hming a lang. Nikum khan Barca midfielder Pedri hian a lo dawng tawh a, kuminah pawh dawng thei zingah a la tel.

Catalan club hmelma Real Madrid erawhin Eduardo Camavinga chiah an thawh a, Rodrygo leh Vinicius ten season hmang ṭha mah se an kum avangin thlan theih an ni lo. La Liga aṭangin Nico Williams (Athletic Bilbao) leh Yeremi Pinto (Villarreal) te an tel a, an player thawh pariat zinga pasarih hi ram tana khel pha an ni.

Bundesliga aṭangin player 22 ngawt an awm. Chung zingah chuan Borussia Dortmund duo Jude Bellingham leh Gio Reyna bakah Bayern Munich midfielder Jamal Musiala te chu a buk rit zinga mi an ni. Bavarians midfielder thar Ryan Gravenberch pawh a tel.

Premier League aṭangin player 10 an tel. Manchester United, Liverpool leh Wolves ten player pahnih ṭheuh an thawh. PL aṭanga player thlante chu Amad Diallo, Anthony Elanga (Man Utd ve ve), Harvey Elliott, Fabio Carvalho (Liverpool ve ve), Fabio Silva, Ki-Jana Hoever (Wolves ve ve), Yan Couto (Man City), Joe Gelhardt (Leeds), Kacper Kozlowski (Brighton) leh Pape Matar Sarr (Tottenham) te an ni.

Dawng tawhte
Chawimawina hi kum 2003 aṭanga ṭan a ni a, Ajax midfielder Rafael van der Vaart chu dawng hmasa ber a ni.

Player langsar Wayne Rooney, Lionel Messi, Cesc Fàbregas, Sergio Agüero, Mario Balotelli, Paul Pogba, Kylian Mbappé leh Erling Haaland ten an dawng tawh a, Cristiano Ronaldo erawhin a dawng lo.