Arsenal-ah David Luiz awm zel dawn

David Luiz chuan Arsenal tana khel chhunzawm turin season khat daih contract a ziak. Nimin khan Luiz bakah Pablo Mari leh Cedric Soares ten a nghetin North London club hi an zawm a, loan hmanga hawh lai Dani Ceballos chu tun season tawp thleng a cham dawn bawk.

Brazilian defender Luiz hian nikum nipui lai khan Chelsea aṭangin Gunners hi season hnih atan a zawm, season hnuhnung zawk erawh chu inbiak ṭhat leh tura tih a ni. Inbiakna an nei a, tunah chuan nakkumah pawh an kawl chhunzawm dawn.

Loan hmanga an hawh lai Mari leh Soares te chu contract nghet an ziahpui a, a rei zawng tarlan ni lo mah se hun rei tak chhung atan tih a ni. Real Madrid aṭanga tun season atana an hawh lai Ceballos-a loan hun chu June-ah zo dawn mah se tun season chhung atan pawhsei a ni bawk.

Gunners technical director Edu chuan, "Hun rei zawk atan player pathum kan thlung nghet a, pakhat chu tun season atan a ni bawk. Manager Mikel tan pawh chanchin lawmawm a ni ang, team din chhoh nana mi pawimawh an ni.

"Arteta-a'n team a enkawl tirh khan defender a laia khel thei, ke vei lam hmang thiam bawk si a duh, a chhanna chu Pablo hi a ni. Manchester City lakah hliam a nei a, inkhelh leh theih hun kan nghakhlel," a ti.

David Luiz chungchang sawi zuiin Edu chuan, "Kan tan player pawimawh tak a ni, season kal laiah pawh kan tan hna ṭha takin a thawk tawh. Ball pass a thiam a, khelmual chhung leh pawnah midang a ho khawm ṭha bawk," tiin a sawi.

Kum 33 mi Luiz hi Arsenal tana a khelh hmain Chelsea tlarhnung dawltu a lo ni tawh ṭhin, theihna nei sang tak ni mahse chet fimkhur loh vanga tihsual neih a ching. Covid-19 hnua an match hmasa berah pawh penalty a chawi a, ho lam taka ball a hloh vanga goal an chhuah bakah amah hnawhchhuah a ni bawk.

Gunners hian hripui len hnuah league match vawi hnih an khel leh tawh a, champion lai Manchester City leh team nem zawk Brighton an ngam lo. Zanin dar 10:30 hian Southampton an lenchilh zui leh nghal ang.