India tan chak a ṭul

India leh South Africa chuan T20 series an khel mek a, zanin dar 7:00 hian Saurashtra Cricket Association Stadium, Rajkot-ah match nga khelh tura vawi lina an khel ang. Proteas hian match hmasa pahnihah hnehna an chang a, Men in Blue hian match hnuhnung berah hnehna chang mah se series-ah 2-1 a an hnufual avangin chak ngei a ṭul.

India hi Rishabh Pant captain-na hnuaiah an khel a, match hnuhnung berah team angin an khel ṭha. Opener Guturaj Gaikwad (57) leh Ishan Kishan (54) ten half century an siam ve ve a, Hardik Pandya-a'n thi loin 31 runs siam bawkin over 20-ah 179/5 runs an siam.

Mualneitu tan bowler-te an che ṭha a, Harsahal Patel-a'n wicket li lain 25 runs a pe a, man of the match-a thlan Yuzvendra Chahal-a'n wicket thum lain 20 runs a pe bawk. South Africa hian over 19.1-ah 131 chauh an siam thei a, 48 runs-in India an chak.

Visakhapatnam-a inkhelah India tan bowler-te an che ṭha a, Rajkot-ah pawh bowler-te chet ṭhat a pawimawh dawn. Men in Blue hi 2-1 in la hnufual mah se an chak lohna match hnihah hian chak thei dinhmunah an ding ve ve a, hemi a nih avang hian series la tura rinkai zawk an la ni tho.