Forest-ah Henderson, Pereira an zuar?

Manchester United goalkeeper Dean Henderson chu Premier League kai thar Nottingham Forest zawm tura sawi a ni. Nimin thleng kha chuan club pahnih inkarah inremna la awm lo mah se English keeper hian a khelh phakna tur Forest hi a pan ngei a rinawm.

Forest hian Henderson hi loan hmangin lak an tum a, a contract-ah hian a khelh ṭhat dan a zirin pound maktaduai 20 vela lak ngheh theih dan dah tel an duh. Club pahnih hi chu an inrem theih mai a rinawm a, player thutlukna a pawimawh ang.

Man United midfielder Andreas Pereira chu season hnih chhung loan hmanga a khelhna Flamengo-in lak ngheh an tum lo. Kum 26 mi Pereira hian Old Trafford-ah hmun nghet a chang thei lo a, Brazilian club a zawm hma hian Granada, Valencia leh Lazio-ah te loan hmangin a khel kual tawh.

Flamengo-ah hian Pereira hi khel chhe lo mah se Brazilian club hian euro maktaduai 10.5-a lak ngheh an tum lo. Khawthlang media te chuan Man United manager thar Erik Ten Hag-a ruahmannaah Pereira hi a tel lo niin an sawi a, English club hian Brazilian midfielder hi nipui bazarah hralh an tum ang.