Inter lamah Lukaku a kir dawn?

Inter Milan chuan Belgium striker Romelu Lukaku neih let theih an inbeisei. Chelsea hnena man to taka an hralh tawh hi, man tlem leh hlawh hniam zawka neih let an tum mek a, nipui bazarah an indawr chho dawn niin a lang.

Nikum August thla mai khan Lukaku hian Blues hi a zawm, pound maktaduai 97.5 man tehmeuh a ni. Inter Milan tana Serie A champion ni thei a nih avangin a man a tam hi a mak hran lo, mahse London khawpuiah erawh beisei angin a khel chhuak lo.

Italian club hian sum tam tawk tak tawktarh tur an nei lo. Khawthlang media ten an tarlan dan chuan, loan hmanga hawh an duh, hei bakah hian a hlawh ṭhenkhat chu Chelsea lamin la tum ṭhensak bawk se an duh niin an sawi.

Thomas Tuchel-a'n season tir lamah Lukaku hi chhawr a tum viau a, hun ṭha pawh a pe hnem. Amaherawhchu, Antonio Conte-a'n a enkawl laia a chet dan nen a inthlau viau, ei leh in thlengin a in thunun tawk lo niin an sawi bawk.

Kum 29 mi Lukaku ngei pawhin Inter lama kir hi a hreh lo niin an sawi bawk a, beisei phak lo leh hlim vak lo chunga Blues jersey hak chhunzawm ai chuan San Siro lama puanthuah a pu lut leh a nih pawhin a mak lo ang.