Ka châm dawn chuan ka duh hunah league an ṭan tur a ni - Igor Stimac

Igor Stimac kaihhruainain Asian Cup khel turin India an tling a, Croatian coach hi a ṭawng pawr hle. Stimac chuan India team enkawl hna chelh chhunzawm tur chuan a duh huna league an ṭan a ṭul thu a sawi.

Stimac contract neih lai hi September thlaah a tawp dawn. Croatian coach chuan, "Ka cham dawn a nih chuan league hi ka duh hunah an ṭan a ngai. Kan player thlante hian club an nei ngei tur a ni a, tun ai hian AIFF leh club-te inkar ṭha zawk a awm tur a ni.

"Club lama coach-te nen mimala hma an sawn theih nan training-naa an mamawhte sawiho a ṭul. Player-te hi an awm khawm tam a ṭul a, coach-te pawhin Indian player-te tan hun an pek tam a ṭul bawk," tiin a sawi.

India hian Stimac hnuaiah result ṭha an nei meuh lo a, amaherawhchu inelna an hmachhawn hnuhnun ber AFC Asian Cup qualification-ah erawh an khel ṭha takzet. Blue Tigers hian an group-a awm Cambodia (2-0), Afghanistan (2-1) leh Hong Kong (4-0) te chu an hneh vek.

Stimac chuan sawi chhunzawmin, "I League-ah foreigner tih tlem a ṭul. Striker leh centre back ka mamawh a, I League-a foreigner awm chhan hi ka hrethiam lo. Hmasawn kan duh chuan harh thar a ngai," tiin a sawi a, foreigner vanga Indian player-te an nih tur ang an nih loh thu a sawi.