Chelsea kalkawngah City
Premier League-ah Chelsea chu champion ngei tura ngaih an ni tawh a; amaherawhchu kartawpa Crystal Palace an hneh loh avangin ngaihtuah nawn leh a ngai. Antonio Conte hote hian fiahna hautak an hmachhawn zui dawn a, zanin dar 12:30 hian Manchester City an mikhual ang.
Pep-a beisei titawptu
Bayern Munich leh Barcelona hlawhtling taka enkawltu Pep Guardiola-a'n Chelsea boss Conte aiin season ṭantirhah thawm a nei lian zawk. Champion tura mipui ngaihdan an lakna hrang hrangah pawh Blues hi City bakah Jose Mourinho kaihhruai Manchester United ai pawhin dah hniam an ni.
Amaherawhchu Conte hian Chelsea ṭantute laka Mourinho aia tlatlum turin Manchester United chu Stamford Bridge-ah 4-0 zetin an sawp a, FA Cup aṭangin a hnawt chhuak. Manchester khaw club pakhat zawk City league nomawi beiseina titawptuah Conte hi a ngaih theih bawk.
December 3 khan Chelsea hian Etihad Stadium an tlawh a, hetih lai hian Blues hi hmahruaitu ni mah se anmahni hnaihtu Liverpool leh Manchester City aiin point khat chauhin an hmu tam. Conte hote hian 3-1 in hnehna an chang a, City player pawimawh Sergio Aguero leh Fernandinho te chu injury time-ah buaina siam vangin hnawhchhuah an ni. Eithad Stadium aṭangin Chelsea-in inrintawkna tam zawk an neih phah a, City tan erawh talbuai inṭanna a ni.
Phuba lak hun
City boss Pep Guardiola-a'n a champion tumna tihtawp saktu Chelsea an bu zawla hneh let hi a duhthusam a ni dawn a, English club lian pathum Liverpool, Man United leh Arsenal te nen Champions League hmun ruak pahnih an inchuh avangin chak ngei an mamawh bawk.
SPep chuan, "Chelsea an chak lo a, Arsenal nen kan inhnehtawk. Keini tan chuan hmahruaitu nih hi a har tawh dawn a, amaherawhchu engpawh a thleng thei. Chelsea kan hmachhawn huna kan tihtur hi kan hria a ni," tiin point thum hlawhchhuah an tum thu a sawi.
City hian tun hnaiah result ṭha an nei lo a, inelna hrang hranga an match hnuhnung pangaah vawi khat chiah an chak. Chutihrualin Emirates Stadium-ah mualneitu Arsenal aiin an tlangnel zawk a, 2-2 a inhnehtawk ṭum hian goal hnih hi an khung hmasa zawk ve ve. Amaherawhchu City hmaa ding tur Chelsea hi Arsenal aia tlarhnung phui ṭha zawk daih leh goal nawr na zawk an nih avangin ho lam taka goal chhuah a thiang tawh lo ang.
Champion tur Chelsea?
Chelsea nomawi chawi theih loh dan kawng aiin chawi theih kawng sawi tur a tam tawh zawk a, Antonio Conte hote nomawi kalkawng erawh a khirh dawn.
Europe inelnaa tel ve lo Blues hian squad an nei ṭha tawk em tih fiahin a awm dawn a, Crystal Palace an hneh loh ṭumin an wing back chhawr rim Victor Moses tel loin ṭum dang an pha lo. Nigerian player Moses hian ke zung ṭang hliam vangin City a hmachhawn theih a rinawm chuang lo.
Italian manager Conte-a'n Moses aiah Pedro a thlang a, Bournemouth aṭanga an koh let Nathan Ake chu squad-ah dah loin bench-a awm Nathaniel Chalobah pawh chhawr a ni lo. Barcelona winger Pedro hian a hna tharah harsatna a tawk a, April thlaah match a tam bawk avangin Conte hote hi talbuai ve thei an ni.
Chelsea boss Conte chuan, "City-in champion tumin season an ṭan a, squad ṭha tak an nei bawk. Amaherawhchu kan khingpui aiin keimahni lam kan inngaihtuah a ṭul a, kan match khelh tur apiang hi a tla chawpa kan thlir a ṭul a ni. Pressure nasa tak a awm a, hei erawh kan tawn ve tur rengah ka ngai," tiin a sawi. Italian manager hian Juventus leh Italy national team a enkawl laiin pressure a tawng hnem tawh a, Conte tan a tawnhriat hman ṭangkai hun chiah a ni.
Blues umtu Spurs
Zanin vek hian Tottenham Hotspur-in tla thei dinhmuna ding Swansea City an hmachhawn dawn. Spurs hian an goal khung khawl Harry Kane chhawr thei lo mah se Mauricio Pochettino hoten point an hloh a rinawm loh zawk.