Reds forward Sadio Mane season a tawp?

Merseyside Derby-a Everton hneh hlim Liverpool chuan zanin dar 12:30 hian league match khel turin Bournemouth an mikhual dawn a, Champions League khelh tum Reds tan Sadio Mane chu hliam vangin a inlan thei dawn lo.

Senegalese forward hian Everton laka 3-1 a an chakna inkhelah goal khung mah se hliam vangin lak chhuah a ngai a, Liverpool boss Jurgen Klopp chuan, "Mane dinhmun a ṭha lo a, a hliam hi eng taka na nge a nih erawh kan la sawi thei lo. Tuna thil chiang awmchhun chu Bournemouth a hmachhawn thei dawn lo tih hi a ni a, a season pawh a tawp hial mai thei," tiin nizana a press conference-ah a sawi.

Reds-in Mane inhliam karah chanchin lawmawm an nei tho a, February 4 hnua inlan leh lo Daniel Sturridge a dam tawh. Klopp chuan, "Sturridge-a'n training a zawm leh tawh a, squad-ah a awm ngei ang," a ti a, inkhel bul erawh a ṭan dawn lo niin a lang.

Klopp chuan an intawn hmasaka 4-3 a an ngam loh tawh Cherries chungchang sawi nghalin, "Kan intawn hmasak kha ka la hre reng a, ngaihtuah erawh a ṭul tawh lo. Chhuanlam turin players inhliam kan kawl ngei a, mah se team dang pawhin an nei ve tho. Thil tam tak kan zir tawh a, kan inring tawk a ni," tiin Bournemouth lakah chak a inbeisei.