Serena tan nomawi hmasa

Tennis season an ṭan chauh a, world number 1 hlui Serena Williams chuan kumina a nomawi hmasa ber atan nimin khan Auckland Classic title a la fel leh der tawh.

Australia rama inelna neihah Serena hian nomawi chawi turin amah ang bawka American player ve tho Jessica Pegula chu 6-3, 6-4 in a hneh. 2017 Australian Open hnua a champion lehna hmasa ber a ni a, inelna a hmachhawn pumpuiah title 73 zet a la tling ta.

Kum 38 mi Serena hi tun hnaiah a vanduai thei hle. Wimbledon 2018 leh US Open 2019 final-ah te khan a chak lo zawkah a ṭang ve ve a, Grand Slam nomawi 23 a chawi tawh chu a la belh thei rih lo.

American star Serena chuan, "Hun rei tak ka inkhel ta a, hun hlimawm leh lungngaihna pawh ka tawng hnem tawh hle. A pawimawh ka tih chu tun thlenga inkhel thei tura hriselna ṭha ka la nei thei hi a ni, ka tan kum ṭha a nih chhunzawm ngei ka beisei," a ti.

Tennis player zinga Grand Slam la hnem ber Margaret Court-i record (24 titles) nih rual turin Serena hian hun ṭha a nei mek, kumina a thil tum langsar ber zinga mi pawh a ni - January 20 aṭang hian beiseina sang tak nen Australian Open lamah a inlan zui leh ang.