Khatla TBL-in Chris Solomon an lalut

Mizoram Super League vawi hnih cham­pion tawh Khatla TBL-in vawi thum an champion tumna kawngah harsatna an tawk a, an match hmasa berah kai thar Chanmari Hollow hneh hramin match hnihnaah Zarkawt BCA lakah 51-67-in an mualpho.

Khatla TBL-in mual­pho nawn an tum lo a, MSL2-a an player pawi­mawh Vishesh Bhriguvashi lalut thei lo mah se American player Chris Solomon an lalut.

UBA-a Bengaluru Beast guard Solomon hian nimin khan Aizawl a rawn thleng a, April 6, Ningani zana Khatla TBL-in Zarkawt Serpents an hmachhawn hunah a inlan nghal ang.

TBL manager Lal­awm­puia Pachuau chuan, "Solomon hian team a tiphur takzet a, inrintawkna kan neih let phah ang. UBA a-ṭangin player ṭha tak a ni tih kan hria a, kan lalut thei hi kan lawm a ni," tiin Vanglaini palai a hrilh.

Kum 27-a upa Solo­mon hi shooting guard a ni a, feet ruk leh inches thuma sang a ni a, a khelh dan hmang hi Mizote hmuhnawm tih tur tak a ni. TBL player thar hi a che rang a, a kut vei lam a hman thiam zawk avangin dan harsa sawt ang.

Solomon hian 3-points a lut thei a, ball sem kual turin Mizo zinga point guard langsar H. Laldinsanga a awm bawk avangin Khatla TBL khel a hmuhnawm zual ang.

MSL champion lai hian India jersey ha pha Garry Gill an neih tawh bawk nen Zarkawt BCA nena khelh nawn an châk dawn a; amaherawhchu he mi thleng tur chuan Serpents, Mission Veng Vikings leh Tuikual South lakah result ṭha an neih phawt a ṭul dawn a ni.