Chak mamawh Arsenal mualah Hammers

Arsenal chuan zanin dar 12:15 hian Emirates Stadium-ah West Ham United an lo mikhual dawn. Premier League club pahnihte hian tun hnaiah result ṭha an hmu ngai lo! Chak mamawh ve ve an nih avangin London Derby hi a hmuhnawm dawn.

Arsene Wenger a naute hian tun hnai an match hnuhnung 10 aṭangin vawi thum chiah hnehna an chang, heng zinga match hnih chu non-league club lakah a ni. Kartawp league match-ah Manchester City lakah ṭum hnih si an phurh hnuah an sut hram. Season thara Champions League khelh an duh a nih chuan table-a parukna nih hi a hun tawh lo hle - inkhelh hmabak pakua bak a awm tawh lo.

West Ham hi an boruak ṭhat lai a ni bik lo, inkhel an hma­chhawn hnuhnung 10-ah Arsenal nen chakni hmel an hmuh zat a inang. KCOM Stadium-ah Andy Carroll goal khung an vawnhim theih loh avangin Hull City 2-1 in an hneh lo, a zawnin league match li an tlawmna chiah a ni. Hammers hi table-ah 14-na an nih avangin hmasawn an ngai takzet.

Nikum December thla khan team pahnihte hi London Sta­dium-ah an intawng tawh, mikhual tan Alexis Sanchez-a'n hattrick a siam bakah Mesut Ozil leh Alex Oxlade-Chamberlain ten goal khungin Arsenal 5-1 in an chak. Hammers tana goal khat khungtu hi Andy Carroll a ni, English striker palian hi Emi­rates Stadium-ah pawh player hnawksak ni thei tur a ni ang.

Hliam leh dam

Arsenal tan City hmachhawn thei lo midfielder Aaron Ramsey leh Alex Oxlade-Chamberlain te an inkhel thei tawh dawn a, keeper Petr Cech hliam dam ṭan tawh mah se David Ospina chu inkhel bul ṭan tura rinkai zawk a ni rih.

Gunners defender rinrawl Lau­rent Koscielny chu a khel thei dawn lo. France international hi City nen an inkhelh ṭumin a ke hliam vangin half time-ah lakchhuah a ni a, manager Wenger chuan a defender hi a lo kir hun tur sawi lawk theih a la nih loh thu a sawi. Striker Lucas Perez leh Santi Cazorla te chu khel thei lo chiang sa an ni bawk.

Slaven Bilic-a'n a duh a nih chuan striker Diafra Sakho a chhawr thei tawh ang. Sakho hi nikum November thla a Manchester United nen Old Trafford-a an inhnehtawkna goal a khung hnuah a hliam avangin Hammers tan tun thlengin a la inlan leh rih lo.

Hull laka chhawr loh Mark Noble chu a dam ṭha leh tawh a, Winston Reid leh Pedro Obiang ten Arsenal la hmachhawn thei dawn lo mah se Michail Antonio a dam tawh.

Wenger tan

Gunners manager Wenger-a'n North London club kum 20 chuang a enkawl hnua a hun tawn khirhkhan bera ngaih a tawng mek, contract thar ziah leh ziah loh chungchangah thu chiang a awm hma loh chuan an buaina hi a reh maiin a rinawm loh hle.

Tun hnai an match apiangah deuhthaw Wenger bang tura duhna thu hmuh tur a awm, amah duh lotute thawm a rin viau rual hian a thil tih ṭhat tawh tam tak hmuh hmaih lotute chuan a lakah rinna an la nghat tlat tih an lantir ve bawk - beiseina zawng zawng a la tawp bik lo.

France pachal Wenger chuan, "Khatiang thil zawng zawng a thlen hnuah pawh kan fan-te khan beidawng loin player an au phur thei, an ropui hle," tiin City nen an inkhelh zawhah a sawi. Wenger hian amah deusawhtute a hmuh hmaih der, an inkhelh leh tur thlirin fans puihna an mamawh tih a hriatchian vangah a ngaih theih.