Sindhu-i'n Malaysia lam a hawi nghal
India Open Super Series champion hlim Pusarla Venkata Sindhu chu tunkar chhunga khelh tur Malaysia Open Super Series-ah a inlan zui nghal dawn.
Rio Olympic silver medalist Sindhu hian Carolina Marin hnehin a vawi khat nan India Open nomawi a chawi a, Malaysia-ah hian seeded parukna ni zuiin a match hmasa berah world number 13 Chen Yufei a hmachhawn ang.
Kum 21-a upa Sindhu hian Macau Open 2015-ah khan Chen Yufei hi a lo hneh tawh, tlang thei tura ngaih a ni. A chak a nih chuan second round-ah khawtul nula Jin Wei Goh nen an intawng ang a, match hnih a chak thei a nih chuan world number 1 Tai Tzu Ying nen an inkhelh a ngai dawn a ni.
World number 1 hlui Saina Nehwal pawh a inlan dawn, Indian shuttler pahnihte hi final hma chuan an inhmachhawn thei dawn lo. India Open quarterfinal-ah khan Sindhu hian Saina hi a hneh.
Malaysia Open hi Badminton World Federation hnuaia season khat chhunga Super Series pathumna a ni a, lawmman a tan $600,000 (Rs. 3,89,81,400) sem ral a ni dawn, inelna round hmas lam hi nizan khan khelh tawh niin April 9-ah final khelh tur a ni.
Kumin Malaysia Open-ah hian world champion ni tawh pali - Carolina Marin, Ratchanok Intanon, Nozomi Okuhara leh He Bingjia te an inlan kim dawn avangin champion a awlsam dawn lo.