AFC CUP Maziya ngamtu Bengaluru
Bengaluru FC-in I League-ah an nomawi humhim turin beiseina nei ngam tawh lo mah se AFC Cup-ah erawh an kawng dal theitu an la tawng lo - Nizan khan an mikhualna ramah Maziya S & RC chu 1-0 in an hneh. Bangalore club hian Maldives club an hmachhawn hma hian Indian Derby-ah Mohun Bagan chu 2-1 in an lo hneh tawh bawk a, match hnih khelh tawhah point ruk an hmu.
Male khawpuia inkhelah Bengaluru-in goal khung turin injury time nghah thlen an mamawh. Khelmual lai aṭanga Bengaluru keeper Amrinder Singh freekick chu Maziya goalkeeper Pavel Viktorovich Matyash-a'n a hisap sual a, heta ṭanga ball kal zel hi English defender John Johnson chuan chakna goal ni turin a khung ta a ni.
AFC Cup group match inkhelah hian Bengaluru coach Albert Roca chuan 4-3-3 formation hmangin player a remkhawm a, Mizo rawlthar Daniel Lalhlimpuia chu hmatawngah awmtir niin captain Sunil Chhetri leh Udanta Singh ten a sir aṭangin an thlawp bawk.
Nizan AFC Cup group stage inkhel dangah Mohun Bagan an inlan bawk a, Kolkata club hian Bangladesh champion Abahani Dhaka mikhualin he chanchin buatsaih lai hian an result kan hre hman lo.