Indian Premier League Zaninah khelh ṭan a ni dawn ta

Cricket khawvela sum tamna leh ngaihhlut hlawh ber ang hiala chhal ngam, Indian Premier League vawi 10-na chu zanin hian khelh ṭan a ni leh dawn.

IPL champion lai Sunrisers Hyderabad chuan match hmasa ber khel tur hian Royal Challengers Bangalore chu zan dar 8:00-ah an lo mikhual ang. IPL hi Sony Six chuan live-in a pe chhuak ṭhin dawn a ni.

Inelna kalphung

Indian Premier League-ah hian team pariat Delhi Daredevils, Gujarat Lions, Kings XI Punjab, Kolkata Knight Riders, Mumbai Indians, Rising Pune Supergiant, Royal Challengers Bangalore leh Sunrisers Hyderabad-te chu double round robin league-in an an khel kual ang a, hriat dan awlsamah chuan home & away-in an khel ṭhin dawn tihna a ni.

Team pariat an inkhelh kual vek hnuah a sang pahnihin qualifier 1 an khel ang a, he inkhela chak zawk hian final an lut nghal ang. Pathumna leh palinain eliminator round an khel ang a, he inkhela chak zawk hian qualifier 2-ah pakhatna leh pahnihna inkhela chak lo zawk kha an hmachhawn leh ang. Qualifier 2-a hnehna chang zawkin final an lut ve leh dawn a ni - final hi May 21-ah khelh a ni ang.

Manto Ben Stokes

February 20 khan IPL-a con­tract nei lai ni lo player lilamna hun neih a ni a, Rising Pune Supergiants tana vaibelchhe 14.5 hlawh tur Ben Stokes chu IPL chanchina ram pawn player manto ber a ni.

English all-rounder hian IPL-a foreign player manto ber Kevin Pietersen leh Andrew Flintoff ten 2009-a record an lo siam tawh chu a khum - Pune fan ten a chungah beiseina an nei sang ang.

RCB-in an bowling thuam chak turin Tymal Mills chu vaibelchhe 12 zetin an lei bawk a, Bangalore club hian IPL nomawi chawi ngei an duh avangin sum lamah an inseng huai hle. An batting line up hi an khingpui tur bowler tan chuan ṭah ti chhuak tham an ni - vai­belchhe 12.5 hlawhtu Virat Kohli, vaibelchhe 9.5 hlawhtu AB de Villiers leh vaibelchhe 8.4 hlawh­tu Chris Gayle-te an intlar tlat!

Batsman langsar

IPL vawi 10 khelh tawhah Virat Kohli chu run siam hnem ber a ni a, RCB captain hian run 4110 zet a vaw chhuak tawh. Run siam hnem lamah Indian players an langsar a, top three hi Indian batsman vek an ni.

Pahnihna Suresh Raina chuan run 4098 a vaw chhuak tawh a, ani hi Gujarat Lions captain niin vaibelchhe 12.5 a hlawh mek. Pathumna Rohit Sharma-a'n Mumbai Indians-ah vaibelchhe 11.5 hlawh mah se a run siam tawh zat 3874 thlir chuan a hlawh hi a phu tih loh rual a ni lo.

Six run vaw chhuak hnem ber Chris Gayle-a'n vawi 251 zet six run a vaw chhuak tawh a, six run vaw chhuak hnem top three-ah run siam hnem lama langsar Rohit Sharma (163 sixes) leh Raina (160 sixes) bawk an lang.

Bowler langsar

Bowling lamah Sri Lankan fast bowler Lasith Malinga chuan wicket 143 la tawhin a la hnem ber a, kum 33-a upa fast bowler hian vaibelchhe 8.1 hlawhin Mumbai Indians tan a khel mek - batsman tan mangchhia a ni.

Indian bowler Amit Mishra-a'n wicket 124 la tawhin Delhi Daredevils tan a khel mek a, a hlawh zat vaibelchhe 3.5 ngaihtuah chuan bowler man man ber a ni hial ang. Pathumna Dwayne Bravo-a'n vaibelchhe li hlawhin Gujarat Lions tan a khel a, West Indies bowler hian wicket 122 a la tawh.

Bowler zinga economy rates (chawh ruala over khata run pe tlem) nei ṭha ber chu Sunil Narine (6.17) a ni a, West Indies off-spin bowler hian a phu ang ngeiin Kolkata Knight Riders tan vaibelchhe riat a hlawh. Pune bowler Ravichandran Ashwin (6.55) chu pahnihna niin vaibelchhe 7.5 a hlawh a, pathumna Anil Kumble-a'n inkhelh chawlhsan tawhin India coach a ni mek!