La Liga Real inlan zanah Barca vs Sevilla
Spanish La Liga-a nomawi chawi tuma inum mek Real Madrid leh Barcelona chu zaninah league match khel turin an inlan ve ve dawn a, Zinedine Zidane-a naute tan inkhel a hautak lo zawk dawn niin a lang.
La Liga hmahruaitu Real Madrid hian zan dar 1:00-ah Leganes chu khualmualah an lenchilh dawn a, Barcelona hian Champions League khelh tum Sevilla chu zanin dar 11:00-ah an mikhual thung ang.
Hmabak hautak
Real Madrid-in an match hnuhnung berah mikhual Alaves chu 3-0 ngawtin sawp mah se result en ang ngawt a ni lo a, an khelh danin beisei a phak lo takzet - minute 80 hnu lama goal hnih an khung avangin an mualpho lo hramah a ngaih theih.
Real-in zanina an luhkhung tur hi an intawn hmasaka 3-0 ngawta an sawp hnu ni mah se an hmabakah Atletico Madrid leh Bayern Munich an la awm avangin Zidane-a'n awmze nei taka a naute a chhawr a ngai dawn a, Alaves laka an khelh dana khelh a thiang lo bawk.
April 8-ah Real hian Madrid derby khel turin league match-ah Atletico Madrid an mikhual dawn a, April 12 zanah Champions League quarterfinal khel turin Bayern Munich an lenchilh leh ang - hmabak a hautak.
Hahchawlh hun?
Real Madrid-in Alaves an hmachhawn hnu lawkah Thawhṭanni zing aṭang khan training an nei lehnghal a, Real Madrid B team aṭangin Enzo, Salto, Seoane leh Lin ten training an zawm avangin Zidane-a'n a player ṭha ṭhenkhat a hahchawlhtir dawn niin a lang.
Cristiano Ronaldo-a'n yellow card pali a hmu tawh a, vawi khat dang yellow card pek a nih leh chuan match khat hrem a
ṭul tawh dawn. Chumi awmzia chu Portugal captain hian zanin inkhelah yellow card a hmu a nih chuan Madrid Derby a khel thei dawn lo tihna a ni a, hlauthawng taka khelhtir ai chuan chawlh hahdamtir mai Zidane-a'n a thlang zawkin a rinawm.
Real tan Alaves laka inlan lo Sergio Ramos, Keylor Navas, Marcelo, Casemiro leh James Rodriguez te erawh an inlan rin a ni a, Real squad a chhah miau avangin Leganes laka talbuai tur khawp an ni lo.
Messi hoin Barca
Barcelona-in zaninah Sevilla hmachhawn dawn mah se an hmabak match-ah Malaga an hmachhawn dawn avangin players awltir chungchangah harsatna an nei lo ang.
Real-in Leganes zawhah inkhel hautak pahnih an nei dawn a, Barca-in duh thlang thei se zanin inkhel hautak neih zawha Malaga hmachhawn hi an duhthlanna a ni ngeiin a rinawm - Catalan club hian Malaga zawhah April 12 khian Juventus chu Champions League quarterfinal-ah an lenchilh dawn.
Messi-a'n hrem vangin an match hnuhnung bera Granada 4-1 a an sawp ṭumin a hmel lan thei lo mah se zaninah erawh a inlan thei leh tawh dawn a, Granada lakah Luis Suarez leh Neymar ten goal an khung ve ve bawk si nen Argentina captain inlan theih hun hi Sevilla tlarhnung lam chuan 'hun lo' an ti khawp ang!
Rafinha tel lohna
Granada lakah Rafinha chu hliam vanga lakchhuah a ni a, Brazilian midfielder chawlh hun chhung tur hi la chiang thei lo mah se zaninah chuan a la inlan thei lo ang. Catalan club hi Rafinha vanga buai tur erawh an ni lo. Luis Enrique chuan a squad chu nomawi chawi thei khawpa chhah a nih thu a sawi.
Barca boss chuan, "Ka squad neih hi nomawi chawi thei khawp kan ni a, player inhliam leh hrem an awm a nih chuan chumi mila inzir mai chu kan hna a ni," a ti a, Granada laka Rafinha inhliam vanga goal khungtu Paco Alcacer luhtirtu coach hian substitution siam dan hre ve tawkah a inngai.
Enrique chuan Rafinha inhliam erawh pawi a tih thu sawi nghalin, "Kan tan chuan channa nasa tak a ni a, a inhliam thu hriat hi thu hriat nuam a ni lo," tiin a sawi.