UCL khel tur Leipzig?

Bundesliga kai thar RB Leipzig tan seaon thara Europe club lian­te inelna sang ber Cham­pions League khel tur­in kawng thui zawh a ngai tawh lo, an hna pawi­mawh hmasa atan zanin dar 11:30 hian Mainz an lenchilh ang.

Kum sarih liam ta maia din chauh mah ni se Leipzig hi German football-ah an mikhual tawh lo hle. Tun season league match 26 an khelh tawhah point 52 an hmu a, table-ah pahnihna niin an tluk loh chu Bayern Munich chiah an ni. Inkhelh hmabak pasarih chiah an nei tawh, pangana Hertha aia an sanna chu point 12 zet a ni tawh.

Leipzig-in a zawna match hnih tlawm hmel an hmuh hnuah kartawp khan a mawngphaha awm Darmstadt 4-0 in an sawp. Hetihlai hian Mainz erawh Ingolstadt lakah 2-1 in an tlawm thung.

Martin Schmidt-a enkawl Mainz hi league table-ah 15-naah an tla hniam a, Schmidt kaihhruian hnuaiah a zawnin match thum an chak lo - Leipzig lakah a chak lo leh a nih chuan Swiss manager-in a enkawl hnulama an chak lo zawn rei ber ṭum a ni ang.