Barcelona-in um phak an duh lo!

Sevilla laka an tawlthluk hnuah Barcelona an tho lehnghal a, Real Madrid hnuaia awm reng duh loin Athletic Bilbao chu Thawhlehni zan khan 1-0 in an hneh. 

Catalan club-in Luis Suarez, Lionel Messi leh Antoine Griezmann-te bul an ṭantir chungin goal khungtu erawh Ivan Rakitic a ni a, Croatian midfielder hian tun season-a a goal hmasa ber a khung. 

Barcelona hian hnehna an chan leh tak avangin La Liga table chung ber an luah leh ta a, he thuziak i chhiar meuh erawh chuan Real Madrid-in an lehpel leh tawh mai thei!

Real Sociedad laka 2-1 a an chak hnua Barcelona tlanpeltu Real hian nizan khan Mallorca an mikhual a, he thu buatsaih a nih lai hian an result kan hre hman lo - an chak chuan table chung berah an awm ang. 

Spanish club zingah tun hnaia Barcelona ngamtu team thlang dawn ila, Athletic Bilbao hi tlarhma lama lang tur an ni - Barca fans-in an hlauthawng a nih pawhin a mak lo. 

Athletic hian tun season La Liga match hmasa berah khan Barcelona hi hnehin football khawvel an lo barakhaih tawh a, Copa del Rey quarterfinal aṭangin Barca hi an pet chhuak bawk. 

La Liga-a Barcelona champion-na tur dal turin hun ṭha an nei leh a, tun ṭumah erawh thawnthu a dang ta -  Barca goalkeeper Marc-Andre ter Stegen zawnah vawi khat mah an pet lo a, German keeper-in hna a nei lo. 

Barca erawhin vawi 18 zet shot an nei a, target-a an shot zat erawh a ropui bik lo - vawi 4 a ni. Ball an chan zat pawh 73% a ni a, hetihrual hian goal an khung lawk theih loh avangin Barca fan-te an thlaphang hman. 

Barca fan-ten goal hmuh hram beiseiin Messi, Suarez leh Griezmann lam an hawi ṭhup a, minute 65-naa Griezmann thlaktu Ansu Fati pawhin goal a rawn keng tel  chuang lo. 

Mahse, Catalan club ṭantute chan loh khanah Ivan Rakitic a lo lang a, kum 32 mi midfielder hian hun tawp nan minute 19 chauh a awm tawh tihah goal a rawn khung - Barca fan-te rilru mangang a rawn beng dai.

Rakitic hian sawiselna a tawk fo a, Barca fans lamin an duh khawp lo a, tun hnaiah chhuak tur anga sawi thawm a ri ring hle. Tun season ṭantir khan Ernesto Valverde hnuaiah hmun a chang meuh lo a,  Quique Setien hnuaiah bul a ṭan meuh lo bawk. 

Bilbao lakah pawh hian bench aṭanga luhtir a ni a, a hna chu ngawi renga thawkin player 'class' a ni tih a pholang - a goal khung hi Messi 'assist' ni mah se Argentine forward hian a tum reng vanga assist niin a lang lo a, ball per chang fuh a, rang taka a hun taka che Rakitic hi fak phu chu a ni. 

Messi-a'n a career-ah goal 699 a khung tawh a, goal 700 khung tlin a tumna chu a la thleng thei rih lo - mahse Rakitic khung tur a assist avangin tun season La Liga-a assist a neih zat chu 15-ah a kai chho. 

Argentine forward hian Nou Camp-a Bilbao a mikhual hnuhnung 11-ah goal 10 khungin assist vawi li a nei a, Barca fan-te pawhin Thawhlehni zana a goal khung lai hmuh an beisei. 

Mahse, Sevilla laka a goal khungna ball boot bun lotu hian Bilbao lakah pawh goal a zawng hmu zo chuang lo a, a hun ṭha neih vawi hnihah a vannei tawk lo. 

Nimina a kum 33 tlinna cham lawmtu Messi hi match hnihah a zawna goal khung loh avangin chuai ta anga sawi chi erawh a ni lo a, a kum ang zat player-ten US, China leh middle east lam an hawi tawh laiin La Liga-ah top scorer (21 goals) a la ni mek tih hriat tel a ṭha. 

Atletico Madrid thiampuipa ni ṭhin khan Barcelona a pan a, Messi hliah khuhna hnuaiah Griezmann-a'n beisei a la phak thei lo - Bilbao lakah goal a khung lo mai a ni lo a, Setien-a'n French forward la chhuaka Fati a luhtir hnuah Barca inkhel a nung sawt!

Griezmann hian Barcelona-a a season hmasa berah match 41 khel tawhin goal 14 a khung tawh a, assist vawi li a nei - Atletico tan season nga a khelh chhunga season tin goal 20 aia tlem khung ngai lo tan record duhawm a ni lo.

 

Hetiang boruak karah hian Spanish sports website lar Diario Gol chuan Griezmann hi Bilbao nena an inhmachhawn hma hian training-naah Messi nen an inhmu thiam lo niin an sawi a, coach Setien a inrawlh a ngai niin an sawi hial. 

Barcelona hi Messi-a player duh Neymar nen sawizawm an la ni reng a, Inter Milan forward Lautaro Martinez hming a ri reng bawk - Griezmann hian season khat lek hnuah Barca chhuahsan pawh ni se thil mak a nih a rinawm loh a, hetihrual hian Diario Gol thuchhuah hi a rintlak takzet a nih chuan Real nena inum Barca hian La Liga nomawi chawi an duh chuan team chhungkaw buaina an chinfel a ṭul ang.