Mizo professional fight awm tawh zawng zawnga fight ropui ber tur chu zanin hian a thleng dawn ta - NT Lalbiakkima chuan WBC Asia continental title hlawhchhuah beiseiin Jayson Vayson a hmachhawn dawn a, fight hmuhnawm beisei la, i tisual lo ang. 
Sheikh AL Maktoum Hall, World Trade Centre, Dubai-ah fight hi neih a ni dawn a, zan dar 8:00-ah fight neih ṭan tur a ni. NT-a te inhnek hi main event tur a ni a, Mizo boxer dang inlan tur Laldingliana leh Alimzhan Tursunov chu co-main event a ni dawn. 
Mizo boxer-te hi a tawp lamah an inhnek ve dawn chauh tihna a ni a, zan dar 8:00-ah inhnek hi en ṭan theih dawn mah se Mizo boxer-te inhnek chauh en duh tan zan dar 9:00 vel aṭanga chan ṭan chauh a fuhin a rinawm. 
Zonet chuan fight hi en theih turin a pe chhuak dawn a, television lama en duh tan Zonet distributor hnenah Rs.100 pein a en theih ang a, online-a en duh tan Zonet Empai subscribe tute tan a en theih dawn bawk - Empai hi Rs. 199 aṭanga inṭanin a subscribe theih. 
Inbuatsaihna hautak NT-a'n WBC Asia title a fight thei dawn tih a hriat hma aṭangin ngawrh takin training a nei sa reng a, Mizo boxer hian dawrtu a ngah avangin fight nei thei reng a ni tih a inhria a, a inthlahdah ngai lo. 

May thla khan WBC lamin NT-a ten title fight an neih tur thu an rawn tichiang a, Zo Keite hian ngawrh lehzualin training a nei ṭhin - ni khata a kilometre tlan zat ringawt pawh khaw ṭhenawma lehlanna tham a ni ṭhin. 
Chu chauh a ni lo - Mizo boxer hian a ei leh in thlengin uluk takin a inthunun a, hemi kawngah hian strength & nutritionist coach Biakzuala Khenglawt (Gtea) chuan a bik takin Mizo boxer hi a enkawl a, an ti mai mai lo. 
NT-a hian chhuna training neih ringawt a duhtawk lo a, chaw ei leh mut chhung tih loh chu hun awl a nei meuh lo a ni ber! Zan lamah coach Lalmuanpuia'n (Mampuia) ṭhahnem ngai takin training a neihpui a, professional boxing-a Mizoram mai ni lo, India hming tiṭhatu ni turin an ti mai mai lo. 
Puitu an hrawl June 14-ah NT-a'n boxer Dinga, coach Mampuia leh a manager Dr. Lalmuanpuia te nen Dubai an pan a, a tuk zing dar 2:00 velah Dubai khawpui hi an thleng - hahdam mai mai awm an nih laiin Siaha boxer rilruah hahdam a lang hman lo. 

Dubai khawpuiah boxing trainer lar Anthony Chill Wilson kaihhruainain training a neih chhunzawm a, US boxing coach hian British boxer ropui Anthony Joshua chu nikum December khan training a lo neihpui tawh. 
September 2021-a Oleksandr Usyk laka a tlawm hnu khan Joshua hian rematch atan intuaithar a tum a, hemi atan hian Dubai khawpuiah Wilson hi a pan vang vang - US coach hian world champion 21 a chher tawh tih hriat tel a ṭha. 
Hei chauh a ni lo - Mizo boxer fight nei tur hian ngaihven a hlawh a, Indian rapper lar Raftaar chuan, "Duhsakna sang ber ka hlan che," tiin NT-a hi duhsakna a hlan a, Siaha boxer-in ring a pan ruala a play tur hla chu Raftaar hian a siamsak bawk. 
Zo Keite ril a ṭam! NT-a'n fight a hmachhawn hnuhnung ber chu February 26 kha a ni tawh a, Pakistani boxer Fida Muhammad chu Dubai khawpuiah tho a lo knockout tawh - a duhkhawp lo. 

Siaha boxer hian professional fight vawi li a hmachhawn tawhah hnehna a la chang vek a, a khingpuite a knockout vek. Mahse, fight a neih apiangah NT-a hmachhawntuten Mizo boxer an chung en lutuk a, an ngam lohzia hmuh turin a awm ṭhin. 
NT-a hian, "Fighter ṭha tak hmachhawn ka duh a, ka châk tawh. Ka thawhpui management lamah pawh fighter ṭha leh hlauhawm min pe turin ka ti ṭhin a, Mizo mipui tan hmuhnawm chhawpchhuah ka duh," tiin Vanglaini a lo hrilh tawh a, a duhna avang hian a beisei ang fighter pe thei lo promotion company a thawhpui pawh a thlak phah ṭhin hial. 
Tunah erawh DJMC Boxing promotion-in NT-a duh ang tak boxer an chhawpsak a, Mizo boxer tan hna a awlsam dawn lo - Jayson hi vawi 11 fight a hmachhawn tawha la tlawm lo a ni a, a hmachhawn tawh zingah Indonesian boxer ṭha Tibo Monabesa (no contest-a puansak) leh IBF mini-flyweight champion Rene Mark Cuarto a in draw pui chu a tel. 
Chona phurawm IBA intercontinental champion lai NT-a hi minimumweight (47.62 kg) a inlan ṭhin boxer a ni a, WBC Asia continental title fight nei tur hian light flyweight (47.62 - 48.98 kg) ah a insawn chho a, Mizo boxer tan a awlsam dawn lo. 

Chu chauh a ni lo - fight hi round 10 neih tura tih a ni a, fit ṭhat a ngai khawp ang. Mizo boxer-in Aizawl khawpuia Gerttipong Kumsahwat a hneh ṭum khan round 10 inhnek tura tih an lo ni tawh a, mahse, NT-a hian round hnih bak mamawh loin hnehna a chang. 
NT-a chuan, "Ka training-naah pawh round 10 inhnek kan nei chhin fo a, ka tan harsatna tur a awm lo," tiin Vanglaini a hrilh a, round 10 inhnek thlen ngai pawh ni se a zuam khawp!
Mahse, NT-a coach Mampuia chuan round 10 inhnek tlin a ngaih a ring lo. National Games 2011-a Mizoram tana silver lo hnek chhuak tawhtu chuan, "Kei chuan round 10 an inhnek thlen ka ring lo," a ti a, a boxer chungah rinna a nghat lian hle - zanin nghak phawt mai ang aw!
Dingliana'n dinchan a tum Dubai khawpuia inhnek turah Mizo boxer Laldingliana a inlan ve dawn a, Tuipui boxer hian featherweight-ah Kazakhstan boxer Alimzhan Tursunov a hmachhawn dawn. Vawi thum professional fight a hmachhawna la chak vek Dinga chuan, "Eng harsatna mah ka nei lo a, ka inpeih tawh. boxer ṭha tak ka hmachhawn dawn a, ka tan chuan fiahna a ni dawn," tiin Vanglaini a hrilh a, zam hmel a pu lo. NT-a leh Dinga enkawltu coach Lalmuanpuia (Mampuia) chuan, "Dinga te fight tur hi media hmachhawnnaah pawh boruak nei ber an ni a, an en châk hlawm hle - face off-ah pawh boruak a awm deuh hat a ni," tiin Dinga te inhnek a 'hot' tur thu Vanglaini a hrilh. Tursunov hian vawi nga fight a hmachhawn tawhah vawi li hnehna a chang a, a fight hnuhnung berah WBC Silver Super Feather title a kawl lai chu chân mah se dah hniam theih a ni lo - boxer tharum ngah leh tawrhchhel tia hriat a ni. Mahse, Mampuia chuan, "Tursunov hi a ṭha tih kan hria a, mahse, Dinga hi technical leh timing-ah a ṭha zawk a, chu chu hman ṭangkai kan tum dawn. Technical leh physical inpawlh a nih dawn avangin a game class a sang dawn," a ti a, round riat inhnek tura tih ni mah se round ruknaah an knockout theih a rin thu Vanglaini a hrilh bawk. Mampuia chuan, "Kan training naa kan zir hi a taka kan hman theih chuan kan chak ang. Round li round rukah chuan kan chak kan ring a, knockout ngei ngei kan tum lo a, mahse, kan knockout erawh kan inring a ni," a ti a, a nau a ring tawk.
Jayson hi rang tak taka hnek ṭhin, tawlhhnung ngai lo a ni a, NT-a nen an khelh dan a inan avangin an inhnek nasa viau turah ka ngai. Mahse, NT-a hi a hnek a dik zawk a, combination hmang nasa tak Jayson-a chet karah vawi tam a hnek fuh theiin ka ring - chu chu NT-a special-na pawh a ni.&nbsp;NT-a hian a hnek na zawk a, a hnek chhuahah a hnek dik hnem zawk ṭhin bawk. Chu tak chu chance kan neihna a ni a, round 10 hmain chak turin chance kan nei hnem khawp ang. Kei chuan 100% in ka chak ngei ka ring.&nbsp;- Lalmuanpuia (Mampuia), NT-a & Dinga Coach
Engzat nge an hlawh dawn? Countdown to the middleast crown series 4 tia hming an pek inhnek turah hian Mizo boxer pahnih NT Biakkima leh Laldingliana ten an hlawh nual dawn a, Mizo boxer pahnih hian an chak emaw chak lo emaw, an sum dawn tur hi an dawng dawn. NT-a hian US dollar 3,000 (Rs. 2,34,244.50) a hlawh dawn a, Zonet chuan pay-per-view aṭanga an sum hmuh aṭangin 10% an chantir ve bawk ang. Dinga hian US dollar 1,500 (Rs. 1,17,122.25) a hlawh dawn a, PPV share 5% a nei bawk. He fight buaipuitu DJMC chuan 70% an chang ang a, Zonet-in 15% an chang ang.