Premier League goal khung theite khawiah nge an kal dawn?

Premier League-ah Manchester City an champion a, Liverpool nen a tawp thlengin nomawi chuhin an inum. Nomawi inchuhna chauh ni loin Champions League leh Europa League khelh tuma inum a ngaihnawm a, relegation battle pawh nung ṭha tak a ni. Tunah erawh season a tawp tawh a, a boruak a dai ta. Season liam taa goal khung thei player-te dinhmun kan bihchiang dawn a, chhuak thei dinhmuna ding pawh an awm nual.

Salah leh Son
Liverpool forward Mohamed Salah-a'n goal 23 tehmeuh a khung a, Jurgen Klopp-a hnuaiah player langsar ber a ni. A dinhmun tichiangtu chu Liverpool Fans' Player of the Season Award leh Players' Player of the Season Award dawngtu a nihna hi a ni. Salah hian kar khatah £200,000 a hlawh nia sawi a ni a, Thiago Alcantara nen an hlawh zat a inang a, Virgil van Dijk aiin £20,000-in a hlawh tlem zawk.

Egyptian forward hlawh hi ṭhahnem viau mah se season liam taah khan Premier League club dang player zingah amah aia hlawh tam player 13 an awm nia sawi a ni a, chungte chu Edinson Cavani, John Stones, Timo Werner, Paul Pogba, N'Golo Kante, Jack Grealish, Raheem Sterling, Romelu Lukaku, Raphael Varane, Jadon Sancho, David de Gea, Kevin de Bruyne leh Cristiano Ronaldo te an ni.

Salah hian contract thar ziak turin a hlawh tihsan a phut a, Reds-in an player pawimawh chelh hi an tihhmasak tur a nih rualin kum 30 mi Eyptian forward hlawh atan hian uchuak taka sum sen an tum lo niin a lang bawk. Reds forward hian Anfield-ah a cham tur thu sawi mah se a dinhmun hi a la nghet bik lo.

Hetihlai hian penalty tel loa goal 23 ngawt khungtu Son Heung-min erawh Tottenham Hotspur-ah a nghet viauah a ngaih theih. Amaehrawhchu Son-a pa Son Woong-jung chuan, "Hmasawn tur chuan tun aiin a thawhrim a ṭul a, tuna a hlawhtlinnaa a lungawi a nih chuan tlak chhiat a hmabak. World Class player anga thlir ni tur chuan khawvel club ṭha berah hmun pawimawh a chang pha tur a ni," tiin a sawi a, Spurs hian nomawi chawi an harsat avangin Son-a pa thlirna ṭawmtu hi an ṭhahnem khawp ang.

Ronaldo, Kane & Mane
Season liam ta nipui bazara boruak ngah pahnih Cristiano Ronaldo leh Harry Kane te nipui bazarah an thawm a reh hle. Man United hian Champions League an khelh dawn loh avangin Ronaldo a chhuak ang titawk awm mah se Portugal captain hi a hlawh a san avang leh a kum a upat tawh avangin awlsam taka Old Trafford chhuahsan thei a ni lo. Man United manager Eric Ten Hag-a'n a game plan-ah a awm thu a sawi a, Portuguese forward hian Europa League a khelh a rinawm.

England captain Kane hi season liam ta khan Man City-in sum ṭhahnem tak nen lakluh an tum a, Spurs chairman Daniel Levy-a'n hralh a tum lo bur. Tun season-ah City-in Erling Haaland an lalut a, Kane erawh transfer thu leng velah a reh hmak. Hetihlai hian Sadio Mane erawh chhuak ngei tura sawi a ni a, Reds-in Darwin Nunez an lakluh tawh avangin Senegalese forward hi a cham a nih chuan thilmak a tling zawk ang.

Mane hi Bayern Munich nen sawizawm a ni a, a chhuah chhan tur chu Anfield-ah a phu ang tawka ngaihhlut a hlawh tawk loh vang a ni thei ang. Senegalese forward hian a hlawh avang te leh Salah thlazar hnuaia awm reng hi a kham tawh niin a lang a, Anfield chhuahsan ngei a duh. Chutihrualin Mane hian contract a la neih avangin Liverpool thuneitute kutah a la awm.

Nghet leh nghet lo
Goal 15 khungtu pathum an awm a; Kevin de Bruyne Diogo Jota leh Jamie Vardy te hi an club khelhna ṭheuhah an nghet hle. Pep Guardiola-a'n De Bruyne a neih avanga a lawmzia hi a sawi fo a, Jota pawhin Jurgen Klopp lawmna a la siam zel. Jamie Vardy pawh kum 35 nih hnuah Leicester City-ah player langsar a ni pha a, Premier League champion zawhah Arsenal sawmna a hnar theih avangin King Power Stadium hi a career zawhna turah a ngaih theih hial.

Goal 14 khungtu Wilfried Zaha-a'n tun hmain Old Trafford a pan tawh a, amaherawhchu Manchester United tan beisei a pha lo. Zaha hian Crystal Palace-ah hmun pawimawh a chang a, a contract neih lai erawh kum 2023-ah a tawp dawn. A contract thlir chuan Zaha hi chhuak ve thei dinhmunah a ding a, mah se transfer bazar-ah erawh thawm a nei meuh lo.

Man City forward Raheem Sterling-a'n goal 13 a khung a, Zaha ang thoa kum 2023 thleng contract a neih avangin transfer-ah thawm a nei ring leh ta. Nikum nipui bazarah pawh khan chhuak tura sawi a ni a, amaherawhchu Euro 2020-ah a khelh ṭhat avangin Etihad Stadium-ah a cham a, tun nipuiah a dinhmun a nghet lo.

Beisei phak baka season hmang ṭha Jarrod Bowen pawhin a hnathawh rah sengin England tan a khel a, chhuak tura sawi thawm pawh a awm. Hammers-in club lian zawkte an elphak loh avangin sawmtu ṭha tak a nei a nih chuan Bowen hi chhuak thei dinhmunah a ding a, mah se tun dinhmunah erawh a cham a rinawm zawk.

Goal 11 khung zingah Mason Mount leh Bukayo Saka te an tel a, player pahnih hi Chelsea leh Arsenal-ah an nghet a, khawih chet thiang lo ve ve an ni. Hetihlai hian goal 11 khungtu zingah Raphinha chu transfer-a thawm nei ring pawl a ni a, goal 10 khung thei Richarlison pawh transfer tingaihnawmtu zinga mi a ni.