Basketball thiam ber Golden State Warriors

Stephen Curry awmna Golden State Warriors chuan Boston Celtics hnehin NBA champion an ni. Tun hnai season riat chhunga a vawi li nan Warriors hi an champion a, 2018 hnua an champion lehna hmasa ber a ni thung.

Game 6 inkhel hmuhnawmah GSW hian 103-90 in hnehna an chang. Best of seven series chu 4-2 in an la a, game 7 khelh hah ngai loin an dinhmun an chingfel - basketball inelna sang berah hian vawi sarih an champion tling ta chiah bawk.

Chak lo Boston Celtics erawhin record ropui siam an tumna an tihlawhtling thei lo. NBA champion vawi 17 ni tawhin title la hnem ber chu an la ni tho a, mahse Los Angeles Lakers nen an champion zat a inang.

An thiam takzet
TD Garden-ah a ni a, khelmual neitu Boston Celtics chet tawh ṭhin dan ngaihtuahin Golden State tan chak beiseina awm mah se beisei san a harsa, champion lai hnehtu Celtics hi thih thaa ṭang tur an nih bawk avangin inkhel ṭan hma aṭangin boruak a nung.

A tirah Golden State Warriors an che fuh lo, 14-2 in an hniam. Mahse, chawlhlawk an hman laiin point 15 zetin an sang fal leh hman. Quarter thumna tir lamah pawh Steve Kerr-a naute hian point 22 tehmeuha san fal lai pawh an nei, anmahni mualah ngei Celtics an hawi hai.

Mahse, Jaylen Brown leh Jayson Tatum te awmna team hian theihtawpin an bei let, an inkar zau tak hi point kuaah te an sawr zim hman a, anmahni basket venghim ṭha chhunzawm ni se chuan lehthal thei dinhmunah pawh an ding hial ang.

Boston Celtics phur vanglai takin Kerr-a'n time out a ko a, a naute a fuih. Draymond Green-a'n basket a rawn nei zui a, point a hlawhchhuah hnu hian mual sira Warriors fans awmkhawm chu hlauthawng lo turin a kutin zaizirin a hrilh.

Curry leh Klay Thompson ten basket an nei chhunzawm a, a khat tawkin Andrew Wiggins leh Jordan Poole ta an inlar ve reng bawk. Point 34 neitu Curry langsar fal mah se, an chak theih chhan erawh a tir aṭanga an thawhhona ṭha vang a ni.

Pasalṭha rual
Steve Kerr-a'n Golden State Warrios a dinthar tirh khan - Curry, Klay Thompson, Draymond Green leh Andre Iguodala te an pawimawh. Anni pali hian 2015, 2017 leh 2018 kan nomawi an chawi tawh, tunah a vawi li nan an champion.

Kevin Durant a rawn inlan zuai a, ani pawh hian NBA title a la. Mahse, 2019 khan Warriors a chhuahsan. Hliam vangin Curry leh Thompson te an buai zui a, an player rorum Green meuh pawh inkhel mumal thei loa a chawlh chang a tam.

Player ṭha rual hi vawi thum an champion hnu hian an ropui reng bik lo, tun hnaiah a zawna vawi hnih playoff khelh phak loh pawh an nei. Mahse, season hmasa khan Curry chuan, "Nakkumah chuan min hmachhawn chak lo ang," tiin a sawi.

Thompson a dam a, tharum ngah Green pawh hliamin a kalsan - a thiam dan ngai rengin Curry a lo la thiam bawk. An thianhoin conference champion an nihpui, chu mai duhtawk loin NBA champion an ni leh ta.

Kum 34 mi Curry chuan, "Champion ni tura kawng dik chu kan hmu leh ta," a ti. Hun a tawp rualin Curry hi court-ah a ṭhingṭhi a, a vawi khat nana champion ang maiin a lawm, hliam leh harsatna hrang hrang paltlang hnua hlawhtling an nih avangin a lawmawm bik.

NBA champion kan ni zet chu a mak, thil thleng thei lo tura ngaih a thleng a ang zawk. Mahse, player ṭha leh ropui rual kan nei a, anni nena kan thawhho chuan hetiang thil hi chu a lo thleng ṭhin,"
- Steve Kerr, GSW Coach

"Kum 12 hnua a vawi khat nan NBA Finals kan khel leh a ni a, kan tum ram thleng zo ta chiah lo mah ila ka naute ka chhuang. Hun pawimawh laiin tihsual kan nei zauh ṭhin a, anni lamin min hrem zel bawk si. Zir tur kan la nei tih a lang," - Ime Udoka, Celtics Coach

Stephen Curry a hlu ber
NBA huang chhunga mimal chawimawina hrang hrang a dawng tawh, tunah chuan NBA Finals Most Valuable Player a ni ta - Stephen Curry tan chawimawina sang lutuk a awm thei lo ang, a phu ang ngeiin award hlan a ni.

Nimin zing inkhel bikah Curry hian point 34 a nei, assist vawi sarih a neih bakah rebound pawh vawi sarih bawk a la. Tun finals match ruk an khelhah hian, chawhrualin match tin point 31.2 a nei. An champion theih nan a thawh hlawk hle.

Regular season bikah chuan NBA Most Valuable Player atan Curry hi vawi hnih an thlang tawh, NBA Finals bikah erawh MVP a nih vawi khatna a ni. All Star zingah vawi riat zet an thlang tawh bawk. Warriors point guard Curry chuan, "A hlu ka ti, a hlu ber erawh team hlawhtlinna a ni thung. Mual sir aṭanga min thlawp tute thawm kha ka hre thei a, anni leh keini tan NBA champion nih hi a hlut dan a inang, kan zavai atan a ni," tiin a sawi.

American star chuan sawi zawmin, "Tun hnai kum thum chhunga harsatna hrang hrang kan tawhte chhut ila, kumina kan champion hi chu a hlu zual hle. Season tirah kha chuan mi rin kan hlawh lo, mahse, tunah chuan a hmawr kan bawk ta," a ti.