Atletico an chak zel

Season thara Champions League khelh tum Atletico Madrid-in La Liga table-a an dinhmun an sawh nghet zel a, pathumna nih chhunzawm turin Levante chu khualmualah 1-0 in an hneh. La Liga match thum chu a zawnin an chak tawh. 

Levante khelmuala inkhelah mualneitu defender  Bruno Gonzalez  chuan minute 15-na lekah an lamah goal a ti lut a, Diego Costa tana Marcos Llorente siamsak lo dan a tumna lamah a chesual - Atletico chuan hei hi chak nan an hmang zui. 

La Liga top four-a Atletico elpui ber Sevilla chuan Thawhṭanni zan khan Villarreal chu 2-2 in an inhnehtawkpui a, Atletico hian Sevilla hi khelh zat inangah point hnihin an tlansan ta.

Top four beisei dang inkhelah Getafe chuan minute 41-naa Jaime Mata goal hmangin Real Valladolid lakah hma hruai mah se first half hun pek belha Enes Unal penalty hmangin Valladolid hian an chhanglet a, 1-1 in inkhel a tawp - Getafe tan top four a hla leh ta sawt.