Chanmari Vikings an chak ve ta

Mizoram Super League season 7-ah a vawi khat nan Chanmari Vikings an chak. Nilaini zan R. Dengṭhuama Indoor Stadium, Mualpuia inkhelah Vikings hian Chawnpui chu 86-69 in an hneh.

Vikings hian match thum an khelh tawhah point li neiin table-ah pangana an ni. Zanin hian Tuikual South nen an inhmachhawn leh nghal ang, a sang pali zinga tel tur chuan chak loh a pawi thui thei tawh dawn a ni.

Chawnpui erawh match li an khelh tawhah an la tlawm vek. Mizo player hlanga khel team awmchhun hian khel ṭha viau mah se chak an harsat, hun pawimawh laia an hriam tawk loh zel avangin an tan chak a harsa, semifinal an khelh a rinawm loh.

Vikings hian an match hmasa berah Raymond Edward Miller Jr. an la chhawr hman lo, team thar Mission Veng Hotshots lakah an tlawm. Ray Miller awm hnuah Zarkawt BCA an ngam lo a, an dinhmun a ṭha lo hman hle.

An match thumnaah erawh an ṭhat dan takin an khel thei tawh. American player Miller-a'n point 26 a nei a, match hmasa lama che ṭha ṭhin Michael F. Lalawmpuia chuan point 17 nei lehin, Lalruatkima (14 points) leh Vanchuangpuia (11) te an langsar bawk.

Zanin inkhel tur hi a pawimawh. TKS lamin hnehna an chang a nih chuan hmahruaitu an ni thei dawn. Phengphehlep hi champion lai BCA hneh hlim an ni a, champion turin theihna an nei - BCA laka point 45 neitu Darrell Bowie chu ven ngun ngai bik a ni dawn.

Vikings hian palina ni phak tur chuan chak an mamawh, a vawi thum nan an tlawm a nih chuan thawhchhuah a harsa tawh mai thei. Tuikual South an hneh a nih erawh chuan an boruak an siam nung thei ang, season hmasa lama an hmuh ṭhin Ray Miller ang ngei kha hmuh nawn leh an duh ang.