Andreescu hnehtu Pliskova

Karolina Pliskova chuan Bianca Andreescu 6-4, 2-6, 7-6 (7) in a hneh a, tun thla tawpa khelh tur Wimbledon inbuatsaihna Berlin Open khelh laiah quarterfinal a in vaw kai.

Seeded palina Pliskova hian a service neih ṭhat a chhawr nawn, match hmasa lama vawi 17 zet aces siamtu hian Andreescu lakah vawi 12 a vaw chhuak nawn a, a service chu hloh ve bawk mah se a buai thui lo.

Pliskova hian season kal laiah nomawi a la chawi lo. Tournament a khelh tawh hoah chuan quarterfinal a luh vawi hnihna a ni a, grass court inelna lian hmachhawn tur a nih avangin tun ṭumah hian champion a tum ruh khawp ang.

Inkhel dangah Coco Gauff pawh a chak. American tleirawl hian Ann Li chu 6-2, 7-6 (2) in a hneh. French Open final-a a chak loh hnuah Gauff inelna a hmachhawn lehna hmasa ber a ni a, a bul ṭan dan a chhe lo.