Indian footballer ṭha ber Liston Colaco

Football Players' Association of India (FPAI) awards chuan ṭum danga an tih ṭhin angin award an sem chhuak ve leh ta a, ATK Mohun Bagan forward Liston Colaco chu Indian player of the year-ah thlan a ni.

April 2021-a vaibelchhe khata Hyderabad aṭanga Bagan pantu Colaco hian season hman zawh takah khan Kolkata club tan ISL-ah match 22 a khel a, goal riat khungin assist vawi li a nei bawk.

Hetihlai hian award dang zawng erawh Hyderabad chanpual a ni. Hyderabad FC left back Akash Mishra chu young player of the year-ah thlan a ni a, ISL champion an nih theih nana match 20-a goal 18 khungtu Bartholomew Ogbeche chu Foreign player of the year-ah thlan a ni a, Hyderabad coach Manuel Marquez chu coach ṭha berah thlan a ni.

Hyderabad FC hi season hman zawh takah khan ISL champion an ni a, award an hum haw hnem ber hi a awm hle. FPAI Awards-ah hian a vawi khat nan hmeichhe player tan award sem a ni bawk a, Anju Tamang (Sethu FC) chu Indian women’s player of the year-ah thlan a ni a, Manisha Kalyan (Gokulam Kerala FC) chu Young women’s player of the year a ni thung.