Spurs an chak, Kane-a'n goal a khung

Tottenham Hotspur-in inelna hrang hrangah match sarih chhung chak hmel an hmuh tawh loh hnuah Thawhlehni zan khan West Ham United 2-0 in an hneh. Spurs hian hnehna an chan avangin palinaa awm Chelsea chu point ruk chauhin an pha lo a, season thara Champions League khel turin beiseina sang tak an la nei a ni.

Tottenham Hotspur Stadium-ah tlak hlau Hammers-in tha pui an thawh a, an goal bawh na mah se tlarhma an nei hriam tawk lo. West Ham forward Antonio-a'n chance ṭha a hlah a, Jarrod Bowen-a'n goal ban a pet per bawk. Jose Mourinho hote an vanduai ve tho, Son Heung-Min-a goal khung chu VAR vangin pawm a ni lo - South Korean forward offside-na hi a te tham hle.

Second half-ah Spurs an vannei a, minute 64-naah Giovani lo Celso corner pet chu Czech midfielder Tomas Soucek-a'n an lamah a ti lut. Uluk takin en let se goal luh hma hian Spurs defender Davinson Sanchez kutin ball a fuh a, tuna dan dinglaiah chuan pawm loh tur a ni a, Hammers an vanduai. Minute 82-naah Harry Kane a rawn inlar a, Spurs-in counter attack hmangin chance ṭha an nei a, English striker hian keeper chauh a hmachhawn hnuah chak nemnghehna goal a khung.

Spurs manager Jose Mourinho chuan, "Result-ah ka lawm a, goal kan chhuah loh avangin player-te pawh an inringtawk sawt ang. Kan bench a chhah ṭha tawh a, ka vannei hle. Thudik tak sawi erawh chuan Hammers hian min hmachhawn turin darkar 24 an nei tling lo a, a fuh zan lo a ni," tiin a sawi.

West Ham manager David Moyes chuan, "Zanina VAR buaipuitu kha tu nge aw? A thiam tawk lo a ni. Hetiang dan hmang tho hian Sheffield nen kan goal min pawm sak lo," tiin thutlukna dik lo an vanduai pui thu a sawi.

Harry Kane-a'n Tottenham Hotspur tana league match 200 a khelh zanah West Ham lamah a khung a, Premier League-ah goal 137 a khungna chiah a ni. England striker hian Premier League-a goal 200 khung a duh thu a sawi a, hetiang ti thei hi Alan Shearer leh Wayne Rooney te chiah an awm.

English striker Kane chuan, "Kum 26 chauh ka ni a, goal 200 hi engtik niah emaw chuan ka khung tlin theih ka beisei. Goal khung hi khawvela nuam ka tih ber a ni," tiin a sawi. Spurs striker hian goal 200 khung turin goal 63 a mamawh a, season khata a khung tam ber ṭumin goal 30 a khung a, a tum ram thleng turin a tlem berah season hnih tal chu England-ah a la cham rih a ṭul ang.

January 1 khan Kane hi a inhliam a, tun season kal laiah inlan hman tawh lo tura ngaih ni mah se Covid-19 vanga buaina a vanneihpui. Kane chuan, "Hun hi a liam zung zung a, match 200-na pawh a lo thleng mai. Kan hun neih kan hman ṭhat a ṭul a ni," a ti.

Kane hian Spurs tan league match 200 a khel a, Premier League-ah erawh 2012-2013 season khan Norwich City tan match thum a inlan tawh avangin match 203 a inlan tawh. English striker hian Alan Shearer leh Wayne Rooney te record khum turin theihna sang tak a nei a, tunah hian match tinah 0.67 goal khung ang a ni.

Goal khung tam ber record kawltu Shearer-a'n goal 260 khung turin match 441 a mamawh a, Rooney-a'n goal 208 khung turin match 491 a mamawh. Statistics aṭanga thlir chuan Kane hi goal 200 thleng turin a dinhmun a ṭha a, mahse a tum ram thleng turin Andrew Cole, Sergio Aguero, Frank Lampard, Thierry Henry, Robbie Fowler, Jermain Defoe, Michael Owen, Les Ferdinand, Teddy Sheringham leh Robin van Persie te a khum phawt a ṭul ang.