Draw specialist Jose Mourinho

Manchester United-in Premier League match hnu­hnung 20-ah hneh loh an tawng lo a, amaherawhchu Jose Mourinho hote hian Old Trafford-ah vawi kua an khingpui an draw a, tun season league match-a an khingpui vawi 12 zet an draw ta - Champions League khel phak tak maw?

Thawhlehni zan khan Old Trafford-ah Merseyside Derby-a Liverpool laka 1-3 a chak lo hlim Everton an lenglut a, Toffees-in Phil Jagielka hmanga minute 22-naa an hma hruaina chu United-in minute 94-naah Zlatan Ibrahimovic penalty hmangin an sut hram a, 1-1 in inkhel a tawp.

Vanduai nge vannei?

Manchester United-in hrem hnua rawn kir Ibrahimovic leh Marcus Rashford hmangin goal khung theihna chance ṭha an hlah nghal. Everton an insiamrem hnuah Spanish keeper David de Gea-a'n Belgian winger Kevin Mirallas goal khung tur a dan sak a, corner aṭanga ball kal chu Toffees defender Phil Jagielka-a'n United defender Marcos Rojo venna hnuaiah United keeper kap karah a khung.

United venghim ṭhintu De Gea-a'n a tih tur a tih tawk loh chuan Jose Mourinho hote tan chuan buaina hmahruai a ni a, first half-ah Daley Blind-a freekick pet chu keeper Joel Robles-a'n nam per hmanin Ander Herrera-a'n angle zim tawk tak aṭangin goal ruakah crossbar a pet per.

Second half-ah khawvela player manto ber Paul Pogba luhtir a ni a, French midfielder hian six yard box chhung aṭangin crossbar a tauh per a, Ibrahimovic a tauh goal chu offside vangin pawm a ni lo - replay en let hnuah assis­tant referee-in a phar sual tih hmuh theih mah se thutlukna erawh tihdanglam theih a ni lo.

Injury time-ah substitute Luke Shaw ball pet chu Ashley Williams-a'n a kutin a lo dang a, Everton defender hian red card a hmuh bakah penalty a chawi bawk. Zlatan Ibrahimovic-a'n penalty hi keeper Robles-a bum nan a hmang a, point khat an hlawh chhuak.

Old Trafford-a tlangnel

Everton boss Ronald Koe­man-a'n Southamton a enkawl laiin Old Trafford-ah a zawnin hnehna a chang a, a zawna vawi thum chak thei tur dinhmunah ding mah se injury time-a penalty an chawi vang chauhin hnehna an chang lo.

Dutch manager hian Old Trafford-ah league match vawi thum khel tawhin vawi khatmah a tlawm lo.

Everton boss Koeman chuan, "Inkhelh ṭan hma khan point khat min zawrh se ka lei nghal ang. Amaherawhchu 1-0 ni chungin inkhel kan thunun a, a tawp kan khar fuh theih loh kan tuar. Penalty thutlukna a dik a, chutihrualin a tuartu nih chuan pawm harsa tak a ni. A sang pali hi kan hlat lo a, chutihrualin Chelsea leh United angin player kan nei ṭha lo," a ti.

Everton hian hnehna chang se United chungah awmin pangana dinhmun hauh thei an ni a, hnehna an chan zawh tak loah chuan pasarihnaah an lungawi a ṭul ta a ni.

A vui lo, mahse...

Manchester United manager Jose Mourinho chuan, "Dik thlap­in goal hnih kan khung a, goal khat chiah pawm sak ni mah ila linesman chungah ka vui lo. Khatiang thutlukna harsa kha chu video assistant replay (VAR) tel lo chuan siam dik a harsa a, ka hriatthiam pui a ni tih pawh ka hrilh tawh," tiin match offical thutlukna a sawi sel lo.

Portuguese manager Mou­rinho chuan, "Kan inkhelh apiangin goal khung theihna tur chance ṭha hlahin bul kan ṭan ziah a, referee thutlukna dik lo vawi tam tak kan tawng a, kan khingpui keeper ṭha tak takin an dang a, goal venhim tumin kan khingpuite nasa takin tlarhnung an rem phui. Engpawh chu nise goal khungna tur chance kan insiam avangin goal kan khung tur a ni. Chutihrualin chak loh ai chuan draw chu a ṭha a, hneh loh tawng loa hun rei tak kan kal thei hi a ṭha a ni," tiin tun season-a draw an ngah chhan a sawi.

Mourinho hian United a enkawl hmasak berah league match 29 aṭangin point 54 a hmu a, Louis van Gaal aiin point hnihin a hmu tlem zawk! Mahse, David Moyes ai chuan khelh zat inangah point rukin a hmu tam a, pawisa a hman dan aṭanga chhut chuan inchhuanna tur a nei lo.

United hian Old Trafford-ah tun season league match vawi rukah hnehna an chang a, match thum chiah an khelmualah khelh tur nei tawhin chung zingah chuan league hmahruaitu Chelsea an la hmachhawn dawn.

Scottish manager Moyes-a'n United a enkawl season khan Old Trafford-ah vawi kua an chak a, vawi hnih hi Ryan Giggs-a hnuaia chak ni tho mah se Mourinho hian Sunderland manager nilai Moyes-a record chhuanawm lo tak phak lo thei dinhmunah a ding.